Հարաբերություններ Թուրքիայի հետ կամ ազատություն քաղբանտարկյալներին. կարծիքները կիսվել են

Tert.am. 28-4-2009- Իշխանությունները չեն հասկանում, որ մինչև չկարգավորվի ներքին քաղաքական ճգնաժամը, հնարավոր չէ առաջընթաց հայ ժողովրդի համար բախտորոշ որևէ գործընթացում: Նման հայտարարությամբ այսօր հանդես է եկել ՀԱԿ համակարգող Լևոն Զուրաբյանը` մեկնաբանելով հայ-թուրքական հարաբերությունների կարգավորման վերաբերյալ վերջերս ստորագրված «ճանապարհային քարտեզը»: Նրա կարծիքով` այսօր անիմաստ է հայ-թուրթական հաշտեցման «ճանապարհային քարտեզի» դիտարկումը: «Առաջին հերթին, պետք է դիտարկել ազգային ներքին հաշտեցման քարտեզը. այն է` քաղբանտարկյալների ազատում, երկխոսության սկիզբ և օրինական ընտրությունների անցկացում մայիսի 31-ին»,- ավելացրել է նա: Իր հերթին, իշխող Հանրապետական կուսակցության պատգամավոր Էդուարդ Շարմազանովը, մեկնաբանելով Զուրաբյանի ասածները, հայտարարել է, որ կիսում է իր ընդդիմադիր գործընկերոջ մտահոգությունը: «Ես ևս մեկ անգամ ուզում են ասել, որ նախագահը բավարար և բավական աշխատանքներ է կատարել, որպեսզի Հայաստանում լինի համրաշխություն»,- ավելացրել է նա: Նա հիշեցրել է Սերժ Սարգսյանի վերջին արտահայտություններն այն մասին, որ բազմաթիվ հարցեր դեռևս մնում են անպատասխան և այսօր անլուրջ է խոսել լիարժեք խաղաղության մասին: «Ավելի լավ կլիներ, եթե ընդդիմադիր գործիչները սկսեն աշխատել, այլ ոչ թե պիտակավորեին այս կամ այն քաղաքական գործչին, ով չի կիսում իրենց հայացքները»,- եզրափակել է նա: