«Ժամանակ». ՀՅԴ-ն գնաց Քոչարյանին բերելու

Tert.am. 28-4-2009- Կոալիցիայից դուրս գալու ՀՅԴ որոշման վերաբերյալ հրապարակում է ներկայացրել այս օրաթերթը` հիմնավորելով, որ դա արվել է ի շահ Ռոբերտ Քոչարյանի: Ներկայացնենք հատվածներ: ՀՅԴ-ն գնաց Քոչարյանին բերելու Թեև այժմ կգտնվեն շատ մարդիկ, որոնք գտնվում են գրեթե ամեն իրադարձությունից հետո, ովքեր հարյուր տոկոսով հավատացնում են, թե կատարվածից դեռ օրեր առաջ էին տեղյակ լինելիքի մասին, կամ կանխատեսել էին այն, և նույնը կանեն նաև այս անգամ, բայց, այնուհանդերձ, պետք է խոստովանել, որ կոալիցիայից դուրս գալու մասին ՀՅԴ որոշումը անակնկալ էր... Հիշենք, թե ում հետ կամ ում իշխանության օրոք կոալիցիա կազմեց Դաշնակցությունը։ Դե իհարկե՝ Ռոբերտ Քոչարյանի։ Իհարկե, կոալիցիոն համաձայնության տակ նրա ստորագրությունը չկա, քանի որ նա գնացող նախագահ էր։ Բայց ինչպես ասում են՝ Ռոբերտ Քոչարյանը գնաց, փոխարենը իր տեղը թողեց Դաշնակցությանը։ Այսինքն՝ իրականում Ռոբերտ Քոչարյանը թերևս հենց մնաց կոալիցիայում, բայց Դաշնակցության դեմքով... Հետևաբար՝ պետք է ենթադրել, որ Դաշնակցությունը ընդդիմություն է դառնում Ռոբերտ Քոչարյանի միակ շանսն օգտագործելու համար։ Այլ կերպ ասած՝ Դաշնակցությունը ոչ թե ընդդիմություն է դառնում, այլ դառնում է Քոչարյանի շանսը... Դաշնակցությունն ինքն էլ չի հավատում, որ կարող է ի կատար ածել քաղաքականություն վերադառնալու Ռոբերտ Քոչարյանի ցանկությունը, հետևաբար՝ նախընտրում է հարաբերությունը Սերժ Սարգսյանի հետ չփչացնել միանգամից, այսինքն՝ չայրել կամուրջները, ինչպես ասում էր ՀՅԴ ԳՄ ներկայացուցիչ Արմեն Ռուստամյանը։ Այսինքն՝ Դաշնակցությունը նաև չի վստահում Ռոբերտ Քոչարյանին։ Բայց այդ, դեպքում հարց է առաջանում, թե ինչո՞ւ է ՀՅԴ-ն գնում այդպիսի ռիսկի, ինչո՞ւ է հանուն «նիսյա» իշխանության կորցնում «նաղդ» կոալիցիան...