Խորհրդարանում «պտտվում են» նոր նախարարների անունները

Tert.am. 28-4-2009- Ազգային ժողովի այս քառօրյայի երկրորդ օրը խորհրդարանում բոլորովին այլ տրամադրություններ էին։ Թեև հերթական քառօրյայում ընդգրկված հարցերը քննարկվում էին, սակայն այսօր բոլորի մտքում այլ բան էր։ Դաշնակցության՝ կոալիցիայից դուրս գալուց հետո պատգամավորներն ու կուսակցականները մտածում են, թե ովքեր կնշանակվեն դաշնակցական պաշտոնյաների փոխարեն, որոնք արդեն իսկ հրաժարականներ են ներկայացրել։ Պաշտոնապես ոչ ոք ոչինչ չգիտի, քանի որ, ինչպես Tert.am-ի զրուցակիցներն էին նշում, կոալիցիայում նոր պաշտոնները վերաբաշխելու քննարկում դեռ չի եղել։ Այնուհանդերձ, խորհրդարանում պտտվող լուրերի համաձայն, Ազգային ժողովի դաշնակցական փոխնախագահ Հրայր Կարապետյանի աթոռը կարող է զբաղեցնել ՀՀԿ–ական պատգամավոր, ՀՀԿ մամուլի խոսնակ Էդուարդ Շարմազանովը, գիտության և կրթության նախարարի պորտֆելը կտրվի ԲՀԿ–ին, իսկ նախարար էլ կնշանակվի ԲՀԿ–ական Նաիրա Զոհրաբյանը, իսկ աշխատանքի և սոցիալական հարցերի նախարար էլ կնշանակվի ՕԵԿ–ական Հովհաննես Մարգարյանը։ ԲՀԿ-ական Նաիրա Զոհրաբյանը Tert.am-ի հարցին ի պատասխան ասել է, որ իրեն նման առաջարկ չի եղել ու առհասարակ նման քննարկում չի եղել։ -Պիտի ասեմ, որ բոլոր այդ անունները, որ շրջանառվում են մամուլում, ընդամենը լուրեր են, որովհետև կոալիցիայում պորտֆելների վերաբաժանման քննարկում չի եղել։ Ենթադրվում է, որ քննարկումները կլինեն, բայց ոչ երեկ, ոչ այսօր, ենթադրում եմ ոչ էլ վաղը նման քննարկումներ նախատեսված չեն։ Եթե քննարկումներ չեն եղել, բնականաբար, չի էլ կարող լինել առաջարկ»,- ասել է նա։ «Օրինաց երկիր» կուսակցության մամուլի քարտուղար Սուսաննա Աբրահամյանը ևս նշել է, որ աշխատանքի և սոցիալական հարցերի նախարարությունը ՕԵԿ-ին տալու հարց դեռևս չի քննարկվել։ «Այս պահի դրությամբ նման հարց չի քննարկվել, եթե կլինի կոալիցիայի նիստ, մենք մեր դիրքորոշումը կարտահայտենք», - ասել է նա ու ավելացրել, որ Հովհաննես Մարգարյանն անգամ Երևանում չէ այս պահին, ուր մնաց նրան նման առաջարկ եղած լինի։ Էդուարդ Շարմազանովը ևս ասել է, որ կոալիցիան դեռևս նոր պաշտոնայների նշանակման հարց չի քննարկվել, իսկ իրեն էլ առաջարկ չի եղել ԱԺ փոխնախագահի տեղը զբաղեցնելու։