Մամեդյարովը կրկին խոսում է Մադրիդյանից

Tert.am. 14-5-2010- Ադրբեջանի արտգործնախարար Էլմար Մամեդյարովը բացասական է գնահատում այն հանգամանքը, որ Հայաստանը մինչև օրս չի արտահայտել իր դիրքորոշումը ղարաբաղյան կարգավորման Մադրիդյան նորացված սկզբունքների առնչությամբ։ «Այդ փաստաթուղթը հակամարտության կողմերի հետ Մինսկի խմբի աշխատանքի արդյունքն է»,- այսօր ասել է Մամեդյարովը։ Ըստ Մամեդյարովի՝ Ադրբեջանն ընդունում է փաստաթուղթը և պատրաստ է շարունակել երկարատև խաղաղության պայմանագրին հասնելու աշխատանքը՝ Մադրիդյան նորացված սկզբունքների հիման վրա։ Ինչպես հաղորդում է 1news.az-ը, Ադրբեջանի արտգործնախարարը նշել է, որ իր և Մինսկի խմբի համանախագահների՝ Վենետիկում հունիսի 5-ին կայանալիք հանդիպմանը, հավանաբար, կհրապարակվեն Հայաստանի արտգործնախարար Էդվարդ Նալբանդյանի և միջնորդների միջև Բրյուսելում կայացած հանդիպման արդյունքները։