Ռուսաստանցի փորձագետ. ղարաբաղյան հակամարտության կարգավորման գործընթացում առաջընթացի կանխատեսումը` սուրճի մրուրով գուշակություն է

News.am. 9-1-2012- Ղարաբաղյան հակամարտության կարգավորման գործընթացում առաջընթացի կանխատեսումը` սուրճի մրուրով գուշակություն է: Այս մասին NEWS.am-ի թղթակցի հետ զրույցում ասաց ՄՊՀ հետխորհրդային տարածքում հասարակական-քաղաքական գործընթացների ուսումնասիրման տեղեկատվական-վելուծական կենտրոնի քաղաքական կանխատեսման ծառայության ղեկավար Ալեքսանդր Կարավաեւը` ընդգծելով, որ ներկայումս գերակշռում է ստեղծված իրավիճակի պահպանման միտումը:
«Դա չի վերացնում, իհարկե, եւ քարոզչական պատերազմի ուժեղացումը, եւ դիպուկահարների պատերազմի փաստերը: Ընդհանուր առմամբ, կոնսերվացիան ընկալվում է որպես պաշտոնական Երեւանի համար առավել շահեկան իրավիճակ, քան ցանկացած տիպի դինամիկան»,-հայտարարեց փորձագետը` ավելացնելով, որ վերջին տասնամյակներում Ադրբեջանի ռազմական եւ դիվանագիտական դիրքերը նկատելի ամրացել են:«Ընդհանուր առմամբ, անկախ Ադրբեջանի իրական ուժից, Բաքվի ճնշումը անփոփոխ հաստատուն է դարձել: Սակայն Բաքվում, բացի պատերազմի կուսակցությունից, կա ազդեցիկ խաղաղության կուսակցություն, եւ հաճախ այդ երկու ճամբարները ներկայացված են միեւնույն մարդկանցով, սակայն կախված իրավիճակից` նրանք խմբերի են բաժանվում:
Ադրբեջանցի դիվանագետներն ու գործարարները պատրաստ են խոսել խաղաղության եւ Ղարաբաղի շուրջ գտնվող շրջանների տնտեսական վերականգնման մասին: Հայաստանն, իր հերթին, չունի ֆինանսական ռեսուրսներ այդ տարածքների զարգացման համար: Բացի այդ, ներդրված միլիարդները` ավելորդ ապահովագրություն է անսպասելի պատերազմից, ինչից մտահոգվում են Ստեփանակերտում: Իմ կարծիքով, եթե Երեւանում դրական դինամիկա են ցանկանում, ապա պետք է փորձեն Ադրբեջանի հետ շփման կետ գտնել հենց տնտեսական մոդելի հարցում»,-եզրակացրեց Կարավաեւը: