Օրակարգում Իլհամ Ալիևի հրաժարականն է

Panorama.am. 9-1-2012- Կիրակի օրը «Մուսաֆաթ» կուսակցության գրասենյակում կայացել է ընդդիմադիր ուժերի «Հասարակական պալատ» շարժման առաջին նիստը: Նիստի ժամանակ ընտրվել է շարժման համակարգող խորհրդի նոր կազմը: Այս մասին է հաղորդում «Թուրան» լրատվական գործակալությունը:
Աղբյուրի փոեխանցմամբ, նիստը ղեկավարող Իսա Համբարը «Հասարակական պալատի» անցած տարվա ձեռքբերումները հաջող է որակել:
Ինչ վերաբերում է 2012 թ. առաջնահերթություններին, ապա ըստ Ի. Համբարի՝ առաջիկա տարվա առանցքային հարցը նախագահ Իլհամ Ալիևի հրաժարականի հարցն է, ինչի ամենառաջին պատճառն այն է, որ վերջինս չի ցանկանում երկխոսություն սկսել հասարակության հետ:
«Մենք առաջարկել ենք իշխանություններին երկխոսություն սկսել, ներկայացրել ենք սահուն անցում դեպի ժողովրդավարության ճանապարհային քարտեզը, սակայն իշխանությունները ոչ մի կերպ չեն արձագանքել: Միգուցե պետք է այս ռեժիմի հետ խոսել բարդ լեզվով, որը հասկանալի է իշխանություններին»- նշել է Համբարը: