Ադրբեջանը պատրաստվում է Խոջալուի դեպքերի ժխտումը քրեականացնող օրենք ընդունել

Tert.am. 9-1-2012- Ֆրանսիայում Հայոց ցեղասպանության ժխտումը քրեականացնող օրինագծի պաշտոնապես ընդունումից հետո ադրբեջանական կողմը համարժեք միջոցներ կձեռնարկի։ Այս մասին ադրբեջանական SalamNews գործակալության հետ զրույցում հայտարարել է Ադրբեջանի «Մեծ արարչագործություն» կուսակցության առաջնորդ, խորհրդարանի պատգամավոր Ֆազիլ Մուստաֆան։
Մուստաֆան հավելել է, թե վերոնշյալ օրինագծի ընդունումից հետո Ադրբեջանի խորհրդարանը համապատասխան օրենք է ընդունելու Խոջալուում 1992թ. հայերի կողմից իրականացված «ցեղասպանության» վերաբերյալ։
«Այդ օրենքը հիմնականում կիրառվելու է ֆրանսիացիների նկատմամբ։ Մենք դա կարող ենք կազմակերպել, և եթե Ֆրանսիայի ցանկացած քաղաքացի ժխտի Խոջալուում տեղի ունեցած ցեղասպանությունը, ապա անհապաղ կբարձրացվի նրա ձերբակալման հարցը։ Այդ օրենքը կկիրառվի նաև Ադրբեջանի ցանկացած քաղաքացու նկատմամբ»,–ասել է նա։
Ֆրանսիայի Ազգային ժողովն անցած ամիս ձայների ճնշող մեծամասնությամբ ընդունեց Հայոց ցեղասպանության ժխտումը քրեականացնելու մասին օրինագիծը։ Նոր օրինագծի համաձայն՝ Ֆրանսիայում Հայոց ցեղասպանությունը ժխտողներին մինչև 1 տարվա ազատազրկում է սպառնում և 45.000 եվրո տուգանք։ Օրինագիծը շուտով պետք է քննարկվի Ֆրանսիայի Սենատում։