Չոբոյան. Ֆրանսիացի քաղաքական գործիչները պայմանավորվել են Սենատում հաստատել Հայոց ցեղասպանության ժխտումը քրեականացնող օրինագիծը

News.am. 9-1-2012- Ֆրանսիայի Սենատում Հայոց ցեղասպանության ժխտումը քրեականացնող օրինագծի վերանայումը կարող է հետաձգվել 1-2 օր, բայց ոչ ավելի: Այդ մասին NEWS.am-ի թղթակցի հետ զրույցում նշել է Ռոն Ալպ տարածաշրջանային տեղամասի պատգամավոր Հիլդա Չոբոյանը: Նա հնարավոր հետաձգումը բացատրել է նրանով, որ Սենատում օրակարգի այլ հարցերի քննարկումը կարող է նախատեսվածից ավելի երկար տեւել:
«Սակայն, տվյալ պահի դրությամբ, հաստատված է հունվարի 24-ը: Ամենայն հավանականությամբ, հետաձգում չի էլ լինի»,- նշել է Հիլդա Չոբոյանը:
Հիլդա Չոբոյանը բարձր է գնահատել Սենատի կողմից օրինագծի ընդունման հավանականությունը: «Քաղաքական առումով ամեն ինչ շատ հաջող է ընթանում: Չնայած որ ե’ւ սոցիալիստների, ե’ւ աջ ուժերի ներկայացուցիչների (Ֆրանսիայի նախագահ Նիկոլա Սարկոզիի իշխող կուսակցությունը) շրջանում կան տարաձայնություններ տվյալ հարցի շուրջ, ընդհանուր առմամբ երկու քաղաքական ուժերի ղեկավարներն էլ եկել են համաձայնության Հայոց ցեղասպանության ժխտումը քրեականացնող օրինագծի ընդունման վերաբերյալ»,- հայտնել է պատգամավորը:
Միաժամանակ, Չոբոյանը նշել է, որ Ֆրանսիայի հասարակությունում հայկական օրինագծի ընդունման հետ կապված կարծիքները կիսվել են: «Մտավորականության մի մասը, այդ թվում որոշ պատմաբաններ, լրագրողներ, իրավաբաններ եւ այլն, դեմ են օրինագծի ընդունմանը: Պատճառները տարբեր են եւ բոլորովին կապված չեն թուրքամետ դիրքորոշմամբ: Խոսքը գնում է ընթացիկ քաղաքական կոնյուկտուրայի մասին: Այդուհանդերձ, հավանականությունը, որ այդ գործոնը կազդի Սենատի որոշման վրա, շատ փոքր է»,-նկատել է նա, ընդգծելով, որ ներկայումս ակտիվ աշխատանքներ են տարվում այդ բացասական գործոնը չեզոքացնելու ուղղոությամբ:
Չոբոյանի կարծիքով, այդ արտահայտությունների առավել հավանական բացասական հետեւանքը կարող է լինել օրենքի տեքստում փոփոխությունը, որի արդյունքում այն կրկին կուղարկվի Ֆրանսիայի Ազգային ժողովի քննարկմանը: «Սակայն կրկնվեմ, որ դրա հավանականությունը շատ փոքր է»,-ամփոփել է Չոբոյանը:
Նշենք, որ Հայոց ցեղասպանության ժխտումը քրեականացնող օրինագիծն ընդունվել էր 2011թ. դեկտեմբերի 22-ին: Դրանից հետո Անկարան ետ էր կանչել իր դեսպանին եւ հայտարարել Ֆրանսիայի դեմ 8 կետից բաղկացած պատժամիջոցներ մտցնելու մասին:
Ազգային Ժողովի կողմից ընդունվելուց հետո մի շարք գործիչներ` շանսոնյե Շառլ Ազնավուրը, կինոռեժիսոր Ռոբեր Կետիկյանը, փաստաբան Սերժ Կլարսլֆելդը, թուրք գրող Էրոլ Օզկորայը կոչ էին արել քաղաքական գործիչներին ընդունել օրինագիծը: