Սարկոզին մտադիր է Հայոց ցեղասպանության ժխտումը քրեականացնել ողջ Եվրոպայում. թուրք դեսպան

Tert.am. 9-1-2012- Ֆրանսիայի նախագահ Նիկոլա Սարկոզին մտադիր է եվրոպական բոլոր երկրներին առաջարկել քրեականացնել Հայոց ցեղասպանության ժխտումը։ Թուրքական «Հյուրիյեթ» պարբերականը, վկայակոչելով Ֆրանսիայում Թուրքիայի դեսպան Թահսին Բուրջուօղլուի խոսքերը, հաղորդում է, որ Սարկոզին առաջարկել է Հայոց ցեղասպանության ժխտումը քրեականացնող օրենքի ընդունման վերաբերյալ ԵՄ անդամ բոլոր երկրների միջև շրջանակային համաձայնագիր ստորագրել։
Պարբերականը հիշեցնում է, որ Եվրամիությունում Գերմանիայի նախագահության ժամանակահատվածում ԵՄ երկրներն արդեն իսկ ռասիզմի, ռասայական խտրականության, օտարատյացության և դրանց հետ կապված անհանդուրժողականության դեմ պայքարի, ինչպես նաև հրեաների ցեղասպանությունը՝ Հոլոքոստը, ժխտելու առնչությամբ կոնվենցիա են ընդունել։
«Հյուրիյեթը» գրում է, որ Ֆրանսիան այժմ մտադիր է ԵՄ օրակարգում ներառել Հայոց ցեղասպանության ժխտումը քրեականացնելու հարցը։
Ֆրանսիայի Ազգային ժողովն անցած ամսի ձայների ճնշող մեծամասնությամբ ընդունեց Հայոց ցեղասպանության ժխտումը քրեականացնելու մասին օրինագիծը։
Նոր օրինագծի համաձայն՝ Ֆրանսիայում Հայոց ցեղասպանությունը ժխտողներին մինչև 1 տարվա ազատազրկում է սպառնում և 45.000 եվրո տուգանք։ Օրեր անց օրենքը կքննարկվի Ֆրանսիայի Սենատում։