Դամասկոսում իրանցի լրագրող է սպանվել

Դամասկոսում դիպուկահարի կրակոցից սպանվել է իրանական անգլալեզու «Press TV» հեռուստաընկերության թղթակից Մայա Նասերը, ով Սիրիայի քաղաքացի էր: Ինչպես հաղորդում է «Ուտրո.ru»-ն, հեռուստաընկերության կայքում հայտնվել է հաղորդագրություն, որի համաձայն 33-ամյա լրագրողը սպանվել է դիպուկահարի կրակոցից, երբ ժամանել էր սիրիական բանակի Գլխավոր շտաբի մոտ առավոտյան տեղի ունեցած երկու պայթյունների վայր: Պայթյուններից անմիջապես հետո այս շրջանում փոխհրաձգություն է տեղի ունեցել ընդդիմադիրների եւ զինվորական զորքերի միջեւ: Իրանական մեկ այլ` «ԱԼ-Ալամ» հեռուստաընկերությունը հայտնել է, որ նույն վայրում վիրավորվել է նրա`դամասկոսյան գրասենյակի ղեկավար Հոջեյն Մորտադը, ով Լիբանանի քաղաքացի է: Ինչպես ավելի վաղ հաղորդել էր NEWS.am-ը, սեպտեմբերի 26-ի առավոտյան Դամասկոսի կենտրոնում` Զինված ուժերի գլխավոր շտաբի հարեւանությամբ ահաբեկչական երկու պայթյուն է իրականացվել, ինչի արդյունքում թաղամասում հրդեհ է բռնկվել: Ահաբեկչության հետեւանքով զոհեր չեն եղել: