Հունգարիան դիվանագիտական նոտա է հղել Հայաստանին՝ դիվանագիտական հարաբերությունները վերականգնելու առաջարկով

Tert.am. 26-9-2012- Հունգարիայի Արտաքին գործերի նախարարությունը դիվանագիտական նոտա է հղել Հայաստանի

Հանրապետության ԱԳՆ-ին, հայտնում է այդ երկրի կառավարության կայքը: Ըստ աղբյուրի՝ դիվանագիտական նոտան հղվել է սեպտեմբերի 24-ին: Փաստաթղթով հունգարական կողմը շահագրգռվածություն է հայտնում դադարեցնելու ՀՀ կողմից միակողմանի կարգով դիվանագիտական հարաբերությունների առկախումը՝ առանց նախապայմանների: Փաստաթղթում մասնավորապես ասված է. «Հունգարիայի Արտաքին գործերի նախարարությունը իր ողջույնն է հղում Հայաստանի Հանրապետության Արտաքին գործերի նախարարությանը: Հունգարիայի Արտաքին գործերի նախարարությունը ցանկություն է հայտնում Հունգարիայի կառավարության շահագրգռվածությունը հայտնել՝ դադարեցնելու Հայաստանի Հանրապետության կողմից դիվանագիտական հարաբերությունների միակողմանի կասեցումը՝ առանց նախապայմանների: Հունգարիայի Արտաքին գործերի նախարարությունն օգտվում է սույն առիթից Հայաստանի Հանրապետության Արտաքին գործերի նախարարությանը վերահաստատել իր մեծագույն հարգանքը»: Նշվում է, որ սույն դիվանագիտական նոտան պաշտոնական պատասխան է այն հայտարարությանը, որով օգոստոսի 31-ին Հայաստանի Հանրապետությունը ծանուցել էր Հունգարիայի հետ դիվանագիտական կապերը կասեցնելու մասին՝ Սաֆարովի գործի բերումով: Հիշեցնենք, որ Հայաստանը Հունգարիայի հետ դիվանագիտական հարաբերությունները խզեց այս տարվա օգոստոսի 31-ին։ Պատճառը Հունգարիայի մայրաքաղաք Բուդապեշտում հայ սպա Գուրգեն Մարգարյանին կացնահարելու միջոցով սպանած ադրբեջանցի մարդասպան Ռամիլ Սաֆարովի ազատ արձակումն էր և արտահանձնումը՝ Ադրբեջան։