Ռուսաստանը Թուրքիային առանց մուտքի արտոնագրման արտոնություն է տվել

News.am. 31-3-2011- Ռուսաստանի քաղաքացիները կարող են առանց վիզայի Թուրքիա այցելել սկսած ապրիլի 16-ից։ Այս մասին հայտնել է Ռուսաստանի արտգործնախարարությունը՝ պաշտոնական կայքում տեղադրած համապատասխան հայտարարությամբ։

Հայտարարությունում մասնավորապես նշված է, որ առանց մուտքի արտոնագրման Թուրքիայի քաղաքացիները կարող են ՌԴ-ում գտնվել 30 օր անընդմեջ։
Ռուսաստան արտագնա աշխատանքի կամ ուսման նպատակով մուտք գործող Թուրքիայի քաղաքացիները, որոնք պետք ՌԴ-ում գտնվեն ավելի քան 30 օր, պետք է համապատասխան փաստաթղթեր ունենան, ինչպես նաեւ ձեռք բերեն մուտքի արտոնագիր։
Նշենք, որ ներկայումս Թուրքիայի եւ Ռուսաստանի միջեւ գործում է մուտքի արտոնագրման հեշտացված ռեժիմ։ Թուրքիա զբոսաշրջության նպատակով մեկնող Ռուսաստանի քաղաքացիները կարող են 60-րյա մուտքի արտոնագիր ստանալ Թուրքիայի սահմանային ցանկացած կետում։ Նախորդ տարում Ռուսաստանից Թուրքիա էր այցելել 3,1 մլն զբոսաշրջիկ։ Այս տարի Թուրքիան ռուսաստանցի զբոսաշրջիկների 30 տոկոս աճ է ակնկալում։