ԼՂՀ ժողովրդի կամքը պետք է արտացոլված լինի բանակցային գործընթացում. Ղարաբաղի ԱԳՆ ներկայացուցիչ

HayInfo.146862009 - Լեռնային Ղարաբաղի Հանրապետության ժողովրդի կամքը պետք է արտացոլված լինի բանակցային գործընթացում, պատասխանելով ԶԼՄ-ների հարցերին՝ հայտարարեց ԼՂՀ ԱԳՆ տեղեկատվության վարչության պետ Մարսել Պետրոսյանը։ Ինչպես տեղեկացնում է ԼՂՀ ԱԳՆ մամուլի ծառայությունը, այս մասին Պետրոսյանն ասաց՝ մեկնաբանելով ԵԱՀԿ Մինսկի խմբի ամերիկացի համանախագահ Մեթյու Բրայզայի հայտարարությունն այն մասին, որ «Լեռնային Ղարաբաղի «բնակչության» կարծիքը, նրա մտահոգություններն արտացոլվում է բանակցային գործընթացում»։ «Մենք կողջունեինք տվյալ փաստը և այդ կապակցությամբ կցանկանայինք հիշեցնել միջնորդներին, որ Լեռնային Ղարաբաղի Հանրապետության ժողովուրդն արտահայտել է իր կամքը 1991 թվականի դեկտեմբերի 10-ի անկախության և 2006 թվականի դեկտեմբերի 10-ի ԼՂՀ Սահմանադրության հանրաքվեներում»,- ասաց Պետրոսյանը։ «Մենք շնորհակալ կլինենք միջնորդներին, եթե հանրաքվեներում արտահայտված ԼՂՀ ժողովրդի կամքն ամբողջովին արտացոլվի բանակցային գործընթացում»,- հավելեց նա։