Էրդողանից առաջին արձագանքը Ցեղասպանության օրինագծի հետ կապված. Կատակերգություն էր եւ քաղաքական որոշում

News.am. 5-3-2010- Թուրքիայի վարչապետ Ռեջեփ Թայիփ Էրդողանը իր կուսակցության ղեկավար խորհրդի համաժողովի ժամանակ անդրադարձել է ԱՄՆ Կոնգրեսի Ներկայացուցիչների պալատի Արտաքին հարաբերություների հանձնաժողովի կողմից ընդունված թիվ 252 հայկական բանաձեւի։ Թուրքական NTV-ի փոխանցմամբ՝ Էրդողանը Հայոց ցեղասպանությունը դատապարտող բանաձեւը համարել է կատակերգություն եւ քաղաքական որոշում։ Նշենք, որ այս տեղեկության տակ մի ընթերցող թողել է հետաքրքիր մեկնաբանություն՝ ասելով. «Քաղաքական որոշու՞մ։ Եթե հանձնաժողովը չընդուներ նախագիծը մի՞թե նույնպես քաղաքական որոշում չէր լինելու։ Ուրիշ ի՞նչ էիք սպասում։ Թե՞ Ներկայացուցիչների պալատի հանձնաժողովից գիտական որոշում էիք սպասում»,-նշվում է մեկնաբանության մեջ։