Քլինթոն-Դավութօղլու բանակցություններ. քննարկվել է պետքարտուղարի կովկասյան այցելությունը

Tert.am. 13-7-2010- Երեկ հեռախոսազրույց է տեղի ունեցել ԱՄՆ պետքարտուղար Հիլարի Քլինթոնի և Թուրքիայի արտգործնախարար Ահմեթ Դավութօղլուի միջև: Թուրքական Anadolu գործակալության փոխանցմամբ` 45 րոպե տևած հեռախոսազրույցի ընթացքում կողմերը քննարկել են թուրք-իսրայելական հարաբերությունները, Իրանի միջուկային ծրագիրը, Քրդստանի բանվորական կուսակցության (PKK) դեմ պայքարը, «Ազատության տորմիղի» և իսրայելական բանակի զինվորների միջև տեղի ունեցած միջադեպը, ինչպես նաև Հիլարի Քլինթոնի` հարավկովկասյան և բալկանյան այցելությունները: Հեռախոսազրույցի առնչությամբ հայտարարությամբ հանդես է եկել ԱՄՆ պետքարտուղարության մամուլի խոսնակ Ֆիլիպ Քրոուլին` նշելով, որ Քլինթոնը Դավութօղլուին կոչ է արել շարունակել Իսրայելի հետ երկխոսությունը: «Թուրք-իսրայելական հարաբերությունները կենսական նշանակություն ունեն տարածաշրջանի ապագայի տեսանկյունից»,- հայտարարել է Քրոուլին: Ընդգծելով, որ Քլինթոնը վերահաստատել է Վաշինգտոնի` PKK-ի դեմ պայքարում Թուրքիային աջակցելու պատրաստակամությունը` Միացյալ Նահանգների արտաքին քաղաքական գերատեսչության ղեկավարի մամուլի քարտուղարը հայտարարել է. «PKK-ն շարունակում է մնալ ԱՄՆ-ի, Թուրքիայի և Իրաքի ընդհանուր թշնամին և սպառնում է տարածաշրջանային կայունությանը»: