Ղարաբաղում աճել է ծնելիությունը

«Առավոտ» 19-8-2009- Լեռնային Ղարաբաղի Հանրապետության ազգային վիճակագրական ծառայության հրապարակած տվյալների համաձայն, ԼՂՀ-ում բարելավվում է ժողովրդագրական իրավիճակը. ընթացիկ տարվա առաջին կիսամյակում հանրապետությունում ծնվել է 1 306 երեխա: Ըստ ԱՎԾ տեղեկությունների, ծնունդների թվի ավելացումը պայմանավորված է 2000 թվականից ԼՂՀ-ում իրականացվող կառավարական ծրագրով: Համաձայն այդ ծրագրի, ընտանիքում երրորդ եւ հաջորդ երեխայի ծնվելու դեպքում նրանց անունով բացվում են նպատակային բանկային հաշիվներ: Բազմազավակ եւ երիտասարդ ընտանիքների համար նաեւ տարբեր արտոնություններ են սահմանված: Մասնավորաբար, 2008 թվականի հունվարից յուրաքանչյուր երիտասարդ զույգ ամուսնանալիս 300 հազար դրամ միանվագ նպաստ է ստանում: