Լիբանանում բողոքում են հայ-թուրքական արձանագրությունների դեմ

News.am. 8-1-2010- Հունվարի 10-ին Բեյրութի Հակոբ Տեր-Մելքոնյան սրահում տեղի է ունենալու քաղաքական միջոցառում հայ-թուրքական ստորագրված արձանագրությունների դեմ: Լիբանանում հրատարակվող «Ազդակ» թերթի գլխավոր խմբագիր Շահան Քանդահարյանը NEWS.am-ին հայտնեց, որ միջոցառումը կազմակերպել են երեք ավանդական կուսակցությունները՝ դաշնակցությունը, հնչակյաններն ու ռամկավարները, մասնակցելու են նաեւ հայկական հոգեւոր համայնքները՝ հայ առաքելական, ավետարանական եւ կաթողիկե: «Պահանջքը ան է, որ Հայաստանի Սահմանադրական դատարանը հակասահմանադրական հայտարարե Հայաստան-Թուրքիա արձանագրությունները: Նախատեսվում է, որ հուշագիր հղվի Սահմանադրական դատարանին, որովհետեւ այնտեղ Սահմանադրության հիմքը կազմող Անկախության հռչակագրի երեք հիմնադրույթներ կան, որոնք այս արձանագրությունների մեջ հակասված են»,- նշեց Քանդահարյանը եւ հավելեց. «Առաջինը համայն հայության իղձերու իրականացումն է, երկրորդը՝ Հայաստան-Ղարաբաղ վերամիավորումը, եւ երրորդը՝ Հայոց ցեղասպանության միջազգային ճանաչմանը սատար կանգնելու անհրաժեշտությունը»: