Մ.Ահմադինեժադ. «Իրանցիների համար անհասանելին դառնում է հասանելի»

Panorama.am. 12-7-2011- ԻԻՀ նախագահ Մ. Ահմադինեժադը հուլիսի 11-ին Միյանդվաբում չորս մեծ երկաթուղային նախագծերի մեկնարկին նվիրված արարողության ընթացքում հայտարարել է, որ վերջին 4-5 տարիների կտրվածքով Իրանում էլեկտրաէներգիայի արտադրողականությունն ավելացել է ավելի քան 23 հազ. մգվ: Այս մասին հաղորդում է «IRNA» իրանական գործակալությունը:
Նախագահ Մ. Ահմադինեժադը նշել է, որ բարեբախտաբար ներկայումս էլեկտրաէներգիայի արտադրողականության ծավալը երկրում այնքան է, որ եթե ժողովրդի աջակցությունն իշխանությունների հանդեպ փոքր-ինչ առավել շոշափելի դառնա այդ ոլորտում, ապա Իրանը կվերածվի տարածաշրջանի` համար առաջին էլեկտրաէներգիա արտահանող երկիրը: =
Միաժամանակ, նախագահն իր գոհունակությունն է արտահայտել Իրանի արդյունաբերության, հանքարդյունաբերության, առևտրի և պաշտպանության նախարարություններին՝ աշխատանքում ցուցաբերած արդյունքների կապակցությամբ: Ըստ նրա՝ վերջիններս կարողացել են ապացուցել, որ անիրական թվացող ցանկություններն ու նպատակներն իրանցիների համար ամենևին էլ անհասանելի չեն:
Նշենք, որ Միյանդվաբը գտնվում է Իրանի Արևմտյան Ազերբայջան նահանգում, որտեղ երկաթգծի գործարկման շնորհիվ նահանգի բնակչությունն առաջին անգամ հնարավորություն է ստանում վայելելու գնացքով ճանապարհորդելու հաճույքը: