Լիդինգթոնը նախատեսում է այս տարի Հայաստան այցելել՝ ԼՂ հարցը քննարկելու

Tert.am. 24-1-2012- Մեծ Բրիտանիայի Եվրոպայի հարցերով նախարար Դեյվիդ Լիդինգթոնը ԵԽԽՎ ձմեռային նստաշրջանի շրջանակում (մեկնարկել է հունվարի 23–ին՝ Ստրասբուրգում, Ֆրանսիա) իր ելույթի ժամանակ անդրաձել է նաև Լեռնային Ղարաբաղի հակամարտությանը։ «Մենք ԵԱՀԿ Մինսկի խմբի անդամ ենք, սակայն ներկայացված չենք համանախագահության կառույցում։ Չեմ կարծում, որ Մեծ Բրիտանիան ի վիճակի է ուղղորդել Մինսկի խմբի համանախագհների գործունեությունը։ Կարծում եմ, որ Ադրբեջանի և Հայաստանի իշխանությունները պետք է համաձայնության գան այդ հարցում։ Հակամարտության կարգավորման հիմնական բեռը, նախևառաջ, ընկնում է հակամարտության կողմերի վրա։ 2010թ. ես Ադրբեջան եմ այցելել. այցի ընթացքում հանդիպել եմ նախագահի և այլ պաշտոնատար անձանց հետ։ Այցի ընթացքում մենք բանակցություններ ենք անցկացրել ԼՂ հակամարտության կարգավորման վերաբերյալ։ Այս տարվա ընթացքում նախատեսում եմ Հայաստան այցելել և այդ հարցը քննարկել այնտեղ»,–ասել է Լիդինգթոնը՝ պատասխանելով ադրբեջանցի խորհրդարականի այն հարցին, թե Մեծ Բրիտանիան ինչպես է գնահատում ԵԱՀԿ մինսկի խմբի գործունեությունը։