Ապրիլի 28-ին Կնեսետում կքննարկվի Հայոց ցեղասպանության հարցը

Tert.am. 16-4-2010- Իսրայելի «Մերեց» խորհրդարանական խմբակցության նախագահ Հայիմ Օրոնը ապրիլի 28-ին Կնեսետում քննարկման կներկայացնի Հայոց ցեղասպանության ճանաչման հարցը։ Սակայն պատգամավորն այդ հարցում հոռետեսորեն է տրամադրված։ Այս մասին հաղորդում է izrus.co.il-ը։ Քանի որ ապրիլի 24-ը շաբաթ է, այդ պատճառով Օրոնը մտադիր է Ցեղասպանության թեմայի քննարկմամբ զբաղվել ապրիլի 28-ին՝ խորհրդարանական արձակուրդից հետո։ «Ես մշտապես կապի մեջ եմ հայկական կազմակերպությունների հետ, բայց այս տարի կառավարությունը Ցեղասպանության հարցն ավելի շուտ կթաղի, քան նախորդ անգամ։ Այժմ բանակցային գործընթաց է ընթանում Երևանի և Անկարայի միջև, և շատերը խորհուրդ են տալիս չմիջամտել, չխանգարել նրանց։ Ես կապ չեմ տեսնում 95-ամյա վաղեմության դեպքերի և տարածաշրջանի ներկայիս աշխարհաքաղաքականության միջև, բայց դա է իրականությունը»,- նշել է Օրոնը։ Նշենք, որ կոալիցիայի ղեկավարի պաշտոնում Զեէվա Էլկինի («Լիկուդ») նշանակումից հետո Օրոնը Հայոց ցեղասպանության ճանաչման պայքարում կորցրել է իր դաշնակցին։ «Նախկինում նա գլխավորում էր «Իսրայել-Հայաստան» միջխորհրդարանական խումբը, իսկ այժմ կտեսնենք, թե ինչ ճնշում կգործադրեն նրա վրա կոալիցիայի մյուս անդամները։ Շուտով ես նրա հետ կխոսեմ... Չնայած Իսրայելի և Թուրքիայի միջև հարաբերությունների կտրուկ վատթարացմանը և շատերի ցանկությանը՝ վնասել Անկարային, ես հոռետեսորեն են տրամադրված»,- եզրափակել է Հայիմ Օրոնը։