Ալիեւի ագահությունն ու Էրդողանի անհեռատեսությունը փրկեցին հայ ժողովրդին

News.am. 5-1-2011- 2010 թվականը նշանավորվեց նախագահ Սերժ Սարգսյանի «ֆուտբոլային դիվանագիտության» լիակատար ձախողմամբ` ինչպես ղարաբաղյան հակամարտության կարգավորման, այնպես էլ հայ-թուրքական երկխոսության ուղղությամբ: NEWS.am-ի թղթակցի հետ զրույցում նման կարծիք է հայտնել քաղաքագետ Անդրանիկ Թեւանյանը:
Նա ընդգծել է, որ «ֆուտբոլային դիվանագիտության» վերջակետը դրվել է Աստանայում կայացած ԵԱՀԿ գագաթաժողովում: «Սերժ Սարգսյանն սկսեց «ֆուտբոլային դիվանագիտությունը» նախաձեռնողական քայլերով, ավարտեց հայրենասիրական ճառով Աստանայում, քանի որ ստեղծված իրավիճակում Երեւանին որեւէ այլ բան չէր մնում անելու: Ըստ էության, Ալիեւի ագահությունը, որ չէր ցանկացել «վերցնել» 7 շրջանները Ղարաբաղի կարգավիճակի հանրաքվեի դիմաց, եւ Էրդողանի անհեռատեսությունը, որ հայ-թուրքական գործըթնացը կապեցին ղարաբաղյան խնդրի հետ, փրկեցին հայ ժողովրդին»,- հայտարարել է Թեւանյանը` հավելելով, որ 2010 թվականին Հայաստանը, բացի ձախողված միջազգային փաստաթղթերից այլ բան չի ստացել: Փորձագետի կանխատեսմամբ, այդ անհեռանկարային միտումն արտաքին քաղաքականության մեջ շարունակվելու է նաեւ 2011 թվականին:
Ինչ վերաբերում է տնտեսությանը, Թեւանյանի պդմամբ, 2010-ին շարունակվել է անկումը, չնայած հանրապետության արտաքին պարտքի եռակի ավելացմանը: «Աճել է գնաճի մակարդակը, եւ այդ միտումները պահպանվելու են նաեւ 2011 թվականին»,- հավաստիացրել է փորձագետը:
Խոսելով ներքաղաքական իրավիճակի մասին` Թեւանյանն ասել է, որ ի հակակշռի ճահճացած 2010-ի, 2011-ին եւ 2012-ին բուռն փոփոխություններ եւ քաղաքական վերադասավորումներ կլինեն: