ՌԴ ՊՆ. Ռազմական տեխնիկան անհատույց է տրվելու Հայաստանի զինված ուժերին

Panorama.am. 22-6-2011- «Հայաստանում տեղակայված №102-րդ հենակայանը անցել է զիվորական ծառայության բրիգադային համակարգի, ինչը չի ազդել զորամասերի մարտունակության վրա»,- այս մասին, «Ինտերֆաքս» գործակալության փոխանցմամբ հայտարարել է ՌԴ ՊՆ ԱՊՀ երկրների հետ ռազմական համագործակցության վարչության պետ Անդրեյ Գուսևը:
«Հայաստանի և Ռուսաստանի միջև ռուսական ռազմակայանի արձանագրությունների մասին դաշնային օրենքի» վավերացման շուրջ ՌԴ Պետդումայի Վերին պալատի պատգամավորների հետ խորհրդակցության ժամանակ Անդրեյ Գուսևը տեղեկացրել է, որ այժմ ռուսական հենակայանի զորակազմը կազմում է 4.245 մարդ և հավելել է, որ հենակայանի ամբողջ անձնակազմը պատրաստ է կատարել իր առջև դրված ցանկացած առաջադրանք, այդ թվում՝ նաև ռուս-հայկական միացյալ զորախմբերի կազմում: Ռազմաբազայի օպտիմալացումը չի ազդել զորամասերի մարտունակության վրա:
Խորհրարանականների հարցին, թե որտե՞ղ է տեղակայվելու ավելցուկային զինամթերքը և ռազմական տեխնիկան, ՊՆ ներկայացուցիչը պատասխանել է, որ դրանք տրամադրվելու են Հայաստանի զինված ուժերին, ընդգծելով, որ տրվելու են անհատույց հիմունքներով:
ՌԴ Վերին պալատի պաշտպանության և անվտանգության հանձնաժողովի նախագահ Վիկտոր Օզերովը ընդգծել է, որ «Հայաստանի և Ռուսաստանի միջև ռուսական ռազմակայանի արձանագրությունների մասին դաշնային օրենքի» վավերացումը կնպաստի ռուս-հայկական ռազմաքաղաքական համագործակցության ամրապնդմանը:
Նշենք, 1995թ.-ին Ռուսաստանի և Հայաստանի միջև կնքված պայմանագրի համաձայն Ռուսաստանի №102-րդ ռազմակայանը տեղակայված է Գյումրի քաղաքում:
«Հայաստանի և Ռուսաստանի միջև ռուսական ռազմակայանի արձանագրությունների մասին դաշնային օրենքի համաձայն ռուսական զորքերի տեղակայման ժամկետը նախկին 25-ի փոխարեն երկարաձգվել է 49-ը տարով, հետագայում 5-ական տարի հետաձգման հնարավորությամբ: Ռազմակայանը նախատեսված է խաղաղապահ առաքելություն իրականացնելու, ինչպես նաև դիմակայելու հնարավոր արտաքին ոտնձգությունները: