HayInfo.24-2-2009- Հայ առաքելական եկեղեցու Ռուսական թեմի մայր տաճարի շինարարությունը Մոսկվայում կավարտվի 2010 թվականին։ Այդ մասին «Собеседник Армении» թերթին տված հարզացրույցում հայտնել է Հայ առաքելական եկեղեցու Ռուսական թեմի առաջնորդ, եպիսկոպոս Էզրաս Ներսիսյանը։
Եկեղեցու կառուցման համար տարածքը Մոսկվայի քաղաքապետարանի կողմից տրամադրվել էր դեռևս 1996 թվականին. տարածքը գտնվում է Օլիմպիական պողոտայի մոտակայքում։
Շինարարությունը նախատեսվում էր ավարտել 2001 թվականին, սակայն 2000-ին Հայ առաքելական եկեղեցու Ռուսական թեմի նախկին առաջնորդ, արքեպիսկոպոս Տիրան Կյուրեղյանին մեղադրեցին տաճարի համար նվիրատվություններից 3 միլիոն դոլար յուրացնելու մեջ և զրկեցին հոգևոր աստիճանից։
Նորընտիր եպիսկոպոս Ներսիսյանը ստիպված էր նորից գումար հավաքել։ Վերջինիս խոսքերով, տաճարի կառուցումը վերսկսել է 2006 թվականին ու ընթանում է նոր նախագծով։ Տաճարի ընդհանուր տարածքը կազմում է ավելի քան 25 հազար քառակուսի մետր։
Տվյալ տարածքում տեղակայված կլինեն նաև կիրակնօրյա դպրոց, գրադարան, կոնֆերենս-դահլիճ, ինչպես նաև ստորգետնյա ավտոկայան։ Ընդհանուր առմամբ, շինարարական աշխատանքների ծախսերը գնահատվում են 30-35 ամերիկյան դոլար։
Հարցազրույցի ընթացքում Էզրաս Ներսիսյանը նշել է, որ, եթե հաշվի չառնել Էջմիածնի առաջանիստ եկեղեցին, նմանատիպ եկեղեցական համալիր, որն իր մեջ ներառում է տաճար ու ազգային-մշակութային կենտրոն, հայկական եկեղեցին այլևս ոչ մի տեղ չունի։
Տաճարի բարձրությունն է լինելու 50 մետր /առանց խաչի/, երկարությունն ու լայնությունը, համապատասխանաբար, 40 և 35 մետր, իսկ ահա գմբեթի տրամագիծն է՝ 21 մետր։ Ներսիսյանի խոսքով՝ արդեն ավարտվել են երեսպատման աշխատանքների 25-30 և ինժեներական աշխատանքների 40-50%-ը։ Մինչ այս տարվա երրորդ եռամսյակ, թեմը ծրագրում է բացել և օծել եկեղեցական համալիրի փոքր եկեղեցին։
Wednesday, February 25, 2009
Subscribe to:
Post Comments (Atom)
No comments:
Post a Comment