Աբդուլահ Օջալան. Պետք է ճանաչվի քրդերի ինքնավարության հնարավորությունը

News.am. 24-10-2009- Օջալանը ճանապարհային քարտեզից մի քանի կետ է հայտնել։ Այս մասին տեղեկացնւմ է թուրքական Radikal-ը։ Իմրալի կղզում ցմահ դատապարտված PKK-ի (Քրդական բանվորական կուսակցություն) առաջնորդ Աբդուլահ Օջալանը իր փաստաբանների հետ հերթական հանդիպման ժամանակ փոխանցել է իր կողմից կազմված քրդական հարցի կարգավորման ճանապարհային քարտեզից մի քանի կետ։ «Առաջին փուլում թուրքական պետությունը պետք է քրդերի բոլոր իրավունքները երաշխավորի։ Այս խնդրում մեզ երաշխավորելով՝ մեզ կհամոզեն։ Մենք էլ կհաստատենք, որ անջատողական չենք։ Պետությունն էլ պետք է ժողովրդավարական կարգավորումը ընդունի եւ քրդերի խնդիրներին ուշադրություն դարձնի։ Պետք է ճանաչվի քրդերի ինքնավարության հնարավորությունը։ Սակայն դրանք իրականացնելու համար պետք է իմ առաջն էլ բացել։ Այս ամենը երկար քննարկումներ է պահանջում։ Իմ ճանապարհային քարտեզում 10 սկզբունք կա։ Ես այնտեղ բավարար կերպով ներկայացրել եմ քրդական հարցի ժողովրդավարական կարգավորման ուղիները։ Քրդական հարցի կարգավորումը ոչ թե իշխող „Արդարություն եւ զարգացում“ կուսակցության՝ այլ պետության նախագիծն է։ Իշխող կուսակցությունը այս հարցում խորամանկություն է ցուցաբերում։ Հյուսիսային Իրաքի Քանդիլ լեռան եւ Մահմուրի ճամբարներից եկած խմբերը „խաղաղության դեսպաններն“ էին։ Սակայն այդ խմբերի գալով խնդիրը չի լուծվում։ Եվրոպայից էլ մի խումբ է գալու։ Սրանից հետո խմբերի գալու համար իմ կոչը չի լինելու։ Որովհետեւ դա ճիշտ էլ չէ։ Թող պետությունը գնա PKK-ի հետ հանդիպի եւ պայմանավորվի։ Դա նրանց որոշելիքն է»,-ասել է Աբդուլահ Օջալանը իր ուղերձում։