/PanARMENIAN.Net/ 20.02.2010 - Արցախի Վերածննդի օրվա առթիվ Արցախի Հանրապետության նախագահ Բակո Սահակյանը ողջույնի խոսքով դիմել է ԼՂՀ Ազգային ժողովի բոլոր գումարումների պատգամավորներին: Ուղերձում մասնավորապես ասված է. «Ուրախ եմ ողջունել բոլորիդ եւ շնորհավորել մեր ողջ ժողովրդին : Ձեզնից յուրաքանչյուրն իր մեջ կրում է այդ օրվա խորհուրդը եւ անձնական ավանդ ունի ազգային-ազատագրական շարժման գաղափարների իրականացման գործում: Մեր ընկերներից շատերն իրենց կյանքն են զոհել հանուն այդ գաղափարների հաղթանակի: Հավերժ փառք ու պատիվ նրանց»,-ասվում է ուղերձում
«1988 թվականի փետրվարի 20-ը դարձավ մեր ազգային վերազարթոնքի սկիզբը: Մենք ոտքի ելանք պաշտպանելու հայրենի հողի վրա ազատ ու անկախ ապրելու, սեփական ճակատագիրն ինքնուրույն տնօրինելու մեր բնական իրավունքը` միջազգային հանրության կողմից ընդունված համընդհանուր նորմերին ու սկզբունքներին համապատասխան: Մեր խաղաղ ու արդարացի պահանջին Ադրբեջանը պատասխանեց դաժան ու արյունալի պատերազմով, որը դարձավ բազում մարդկային զոհերի ու ավերածությունների պատճառ:
Արցախի հերոսական ժողովուրդը համայն հայության հետ ձեռք ձեռքի կարողացավ դիմակայել բոլոր փորձություններին եւ բռնեց ժողովրդավարական պետություն կառուցելու ուղին: Մեզ համար այդ ուղին անշրջելի է ու հաստատուն»,-ասել է Բ.Սահակյանը:
«Մենք խորապես համոզված ենք, որ ժամանակակից աշխարհում առկա բոլոր խնդիրները հնարավոր է լուծել միայն ու միայն քաղաքակիրթ ճանապարհով, բանակցությունների սեղանի շուրջ եւ անմիջական երկխոսության միջոցով: Այնինչ Ադրբեջանի իշխանություններն այսօր էլ շարունակում են վարել ռազմատենչ քաղաքականություն` սեփական ժողովրդին պահելով մշտական լարվածության եւ պատերազմի վերսկսման վտանգի տակ: Այդ սպառնալիքներն իզուր են եւ անտեղի: Մենք ունենք կանոնավոր ու մարտունակ բանակ, որը միշտ պատրաստ է արժանի հակահարված տալ մեր պետության եւ ժողովրդի անվտանգության դեմ ուղղված ցանկացած ոտնձգության:
Լեռնային Ղարաբաղի Հանրապետության բոլոր գումարումների Ազգային ժողովն այս տարիների ընթացքում մեծ դերակատարություն է ունեցել մեր անկախ պետականության կայացման, պետական ինստիտուտների ձեւավորման, ժողովրդավարական արժեքների ամրագրման գործում: Այսօր առջեւում են հերթական խորհրդարանական ընտրությունները: Դա անչափ կարեւոր քաղաքական իրադարձություն է մեր ժողովրդի կյանքում: Եվ բոլորս միասին պետք է անենք ամեն ինչ, որպեսզի այս ընտրությունները եւս անցնեն միջազգային չափանիշներին համապատասխան եւ մեկ քայլ առաջ տանեն մեզ Արցախի կայուն ու բարեկեցիկ ապագան կերտելու ճանապարհին»,-ասվում է ԼՂՀ նախագահի ուղերձում:
Saturday, February 20, 2010
Subscribe to:
Post Comments (Atom)
Tehran Time
Yerevan Time
No comments:
Post a Comment