Միխայիլ Գորբաչով. Ղարաբաղի հիմնախնդիրը շատ հին է եւ շատ բարդ

/PanARMENIAN.Net/ 03.03.2010 - Ղարաբաղի հիմնահարցը շատ հին է եւ շատ բարդ: Այդ մասին հայտարարել է ԽՍՀմ առաջին նախագահ Միխայիլ Գորբաչովը: «Ես չգիտեմ, թե ինչ կարելի է այնտեղ անել: Հեղափոխության ժամանակ եւ դրանից հետո որոշվեցին արտաքին եւ ներքին սահմանները, բաժանվեցին հողեր: Եւ բաժանվեցին այնպես, որ հարեւանները միշտ կախում ունենան միմյանցից, որպեսզի միշտ հնարավոր լինի հակամարտություն սերմանել, իսկ Մոսկվային հաշտարար նշանակել: Եվ հողերի այդպիսի բաժանմամբ օրինականացնել կենտրոնի ուժը: Խնդիրներ միշտ են առաջացել.պատերազմից առաջ եւ հետո: Ադրբեջանը եւ Հայաստանն ինձ մեղադրում էին նրանում, թե իբր ես պաշտպանում եմ կողմերից մեկին, բայց դա այդպես չէր: Ես միշտ ասել եմ, որ ազգային հողի վրա տեղի ունեցող նման հակամարտությունները չեն կարող լուծվել, եթե մի կողմը հաղթող լինի, մյուսը` պարտվող: Երկու կողմերը պետք է ընդհանուր հայտարարի գան: Հնարավոր է, երբ լինի միավորված Եվրոպա, այս հանգույցը կտրելն ավելի հեշտ լինի»,- ասել է Գորբաչովը «Կոմերսանտ» թերթին տված Online-հարցազրույցում: