Վաշինգտոնում Թուրքիայի դեսպանը փնտրում է հրեական լոբբիի աջակցությունը

Tert.am. 1-3-2010- Վաշինգտոնում Թուրքիայի դեսպան Նամըք Թանը ԱՄՆ Կոնգրեսի Արտաքին հարաբերությունների հանձնաժողովի կողմից Հայոց ցեղասպանության բանաձևի ընդունումը կանխելու նպատակով հանդիպումներ է սկսել Միացյալ Նահանգներում գործող հրեական կազմակերպությունների ներկայացուցիչների հետ: Sabah օրաթերթի փոխանցմամբ` թուրք դիվանագետը հանդիպումներ է ունենում Ամերիկայի հրեական կոմիտեի (AJC), ԱՄՆ-Իսրայել հասարակական հարաբերությունների կոմիտեի (AIPAC) և Հակազրպարտչական լիգայի (ADL) ներկայացուցիչների հետ: Նշենք նաև, որ թուրքական իշխանությունների` Հայոց ցեղասպանության բանաձևի ընդունումը Կոնգրեսում կանխելու նպատակով Միացյալ Նահանգներ գործուղված երկու խորհրդարանական պատվիրակություններից մեկն արդեն հասել է Վաշինգտոն: Թուրքիայի Ազգային մեծ ժողովի Արտաքին հարաբերությունների հանձնաժողովի նախագահ Մուրադ Մերջանի գլխավորած պատվիրակությունը հանդիպումներ կունենա Կոնգրեսի ներկայացուցիչների հետ: Իսկ Թուրքիա-ԱՄՆ բարեկամության խմբի նախագահ, Թուրքիայի «Արդարություն և զարգացում» իշխող կուսակցության արտաքին հարաբերությունների հարցերով փոխնախագահ Սուաթ Քընըքլըօղլուի գլխավորած պատվիրակությունը Վաշինգտոն կմեկնի այսօր: Sabah-ը, վկայակոչելով Անկարայում ԱՄՆ նախկին դեսպան Մորթոն Աբրամովիչին, գրում է, որ թուրք-ամերիկյան հարաբերություններում ամենահրատապ հարցը Հայոց ցեղասպանության բանաձևն է: Ամերիկացի դիվանագետը հայտարարել է, թե այս տարի մեծ է հավանականությունը, որ Կոնգրեսի կողմից կընդունվի Հայոց ցեղասպանության վերաբերյալ բանաձևը: Աբրամովիչի կարծիքով` այդ հարցում ազդեցություն են ունենալու թուրքական խորհրդարանի կողմից հայ-թուրքական Արձանագրությունների չվավերացված լինելու փաստը և թուրք-իսրայելական հարաբերություններում առաջ եկած լարվածությունը: