Ներկայացուցիչների պալատի հանձնաժողովին
Մարտի 1-ին հանդես գալով հաղորդագրությամբՙ Թուրքիայի արտգործնախարարությունը դիմել է ԱՄՆ Կոնգրեսի Ներկայացուցիչների պալատի արտաքին հարաբերությունների հանձնաժողովին եւ Հայոց ցեղասպանության ճանաչման բանաձեւը մերժելու կոչ է արել:
Արտգործնախարարությունը, ի դեմս խոսնակ Բուրաք Օզուգերգինի, միաժամանակ նախազգուշացրել է, որ բանաձեւի ընդունումը լուրջ վնաս է պատճառելու Թուրքիա-ԱՄՆ եւ Թուրքիա-Հայաստան հարաբերություններին:
Հաղորդագրության մեջ, ինչպես երեկվա համարում նշել էր «Հյուրիեթը», ասված է. «Ցավով ենք ընդունել մարտի 4-ին ցեղասպանության անհիմն պնդումներին տուրք տվող թիվ 252 բանաձեւի ընդգրկումն ԱՄՆ Կոնգրեսի Ներկայացուցիչների պալատի արտաքին հարաբերությունների հանձնաժողովի օրակարգում: Այդ մասին իրազեկել ենք ԱՄՆ-ի պատասխանատուներին տարբեր մակարդակներով: Ակնկալում ենք, որ Ներկայացուցիչների պալատի արտաքին հարաբերությունների հանձնաժողովը կմերժի այն բանաձեւը, որը կվնասի ԱՄՆ-ի հետ Թուրքիայի հարաբերություններին եւ կխաթարի Թուրքիա-Հայաստան հարաբերությունների նորմալացմանն ուղղված ջանքերը: Ուզում ենք հավատալ, որ արտաքին հարաբերությունների հանձնաժողովի անդամները կգիտակցեն բանաձեւի ընդունման բացասական հետեւանքները Թուրքիա-ԱՄՆ հարաբերությունների, ինչպես նաեւ Հարավային Կովկասի խաղաղության եւ կայունության ջանքերի նկատմամբ եւ կգործեն պատասխանատվության զգացումով»:
Օգտվելով առիթից նշենք, որ Ներկայացուցիչների պալատի հանձնաժողովին նախազգուշացրել են նաեւ մարտի 1-ին Վաշինգտոն գործուղված թուրք պատգամավորների պատվիրակությունները: Առաջինը գլխավորում է Թուրքիայի Ազգային մեծ ժողովի արտաքին հարաբերությունների հանձնաժողովի նախագահ Մուրադ Մերջանը, իսկ երկրորդը կազմված է թուրք-ամերիկյան միջխորհրդարանական բարեկամական խմբի անդամներից:
Հ. ՉԱՔՐՅԱՆ
Wednesday, March 3, 2010
Subscribe to:
Post Comments (Atom)
Tehran Time
Yerevan Time
No comments:
Post a Comment