«France-Soir». Էրդողանը սառեցրեց անգամ նրանց եռանդը, ովքեր կողմ էին Թուրքիայի ԵՄ անդամակցությանը

News.am. 15-4-2010- NEWS.am-ը հրապարակում է «France-Soir»-ի էջերում լույս տեսած Ալեքսանդ դել Վալեի «Ժամանակագրություն. Թուրքիայի վարչապետ Էրդողանի տարօրինակ այցը Փարիզ» վերնագրով հոդվածը։ «Իր անհանգստություն առաջ բերող խոսքերով „Արդարություն եւ զարգացում“ կուսակցության առաջնորդը սառեցրեց անգամ նրանց եռանդը, ովքեր կողմ էին Թուրքիայի ԵՄ անդամակցությանը, ովքեր ի դեմս նրա տեսնում էին Արեւմուտքի դաշնակցի եւ աշխարհի միակ քաղաքակիրթ մահմեդական երկրի։ Սկզբում Էրդողանը քննադատությունների ենթարկեց Իսրայելին։ Նա հայտարարեց, որ Իսրայելը „Մերձավոր Արեւելքի վտանգն է ողջ աշխարհի համար“։ Էրդողանը շարունակեց վատացնել իր վիճակը վերջին շաբաթների ընթացքում. նա սպառնաց „վտարել Թուրքիայում ապօրինի բնակվող 100 հազար հայերին“։ Նա շարունակում է հերքել այն ժողովրդի Ցեղասպանությունը, որից փրկվածներին օտար է համարում իրենց իսկ հողի վրա… Էրդողանը մեղադրում է հայկական Սփյուռքին Թուրքիային վարկաբեկելու համար»։ Այո, անպատկառությունը հերիքում է նրան, ով հերքում է 1.5 մլն հայերի Ցեղասպանությունը եւ հպարտանում նրանով, որ ինքը Հոլոքոստը հերքող Ահմադինեջադի «լավ ընկերն է»։ Վերջապես, Թուրքիայի վարչապետը, ով չի հասկանում ԵՄ-ում իրեն տեսնել չցանկացող Փարիզին, ասել է, որ Ֆրանսիան պետք է փոխվի, եւ որ Սարկոզին կփոխի իր դիրքորոշումը Թուրքիա կատարած այցից հետո։