PKK-ականները միանգամից երկու տարբեր հարձակումներ են գործել Թուրքիայի իշխող կուսակցության գրասենյակների վրա

Haynews.am 5-7-2010- Թուրքիայիում ականանետից կրակ է արձակվել իշխող «Արդարություն և զարգացում» կուսակցության Բինգյոլի գրասենյակի վրա, միևնույն ժամանակ ձայնային ռումբ է պայթել Քարլըքովա շրջանի կուսակցական գրասենյակի մերձակայքում: Ինչպես փոխանցում է Dogan գործակալությունը, երկու դեպքում էլ հարձակումը կազմակերպել են PKK-ի զինյալները: Հարձակումների արդյունքում զոհեր և վիրավորնեչ չկան, սակայն հասցվել է նյութական վնաս: Հարձակումները գործած PKK-ականներին հաջողվել է նահանջել: Հիշեցնենք, որ «Քուրդիստանի բանվորական կուսակցությունը» (Partiya Karkerên Kurdistan կամ PKK) քրդական սոցիալիստական և ազգայնական կազմակերպություն է, որի նպատակն է զինված պայքարի միջոցով Թուրքիայի հարավ-արևելյան և Իրաքի հյուսիս-արևմտյան մասում Քուրդիստան պետության հիմնումը: Կազմակերպությունը հիմնադրվել է 1978 թվականին Աբդուլլահ Օջալանի (Ապո) կողմից, ով ներկայումս ցմահ ազատազրկում է կրում: Թուրքական իշխանությունների դեմ մղվող 30 տարվա պայքարի ընթացքում զոհվել է մոտ 45 հազար մարդ: ՔԲԿ-ն ահաբեկչական են համարում նաև ԱՄՆ-ն և ԵՄ-ն: