Եթե գազամուղը վաճառվի Ադրբեջանին, կհայտնվենք պատերազմական իրավիճակում. փորձագետ

«Tert.am», 31.08.10թ: Վրաստան-Հայաստան գազամուղի վաճառքն Ադրբեջանին հայկական կողմի համար պետք է մտահոգիչ լինի։ Այսօր լրագրողների հետ հանդիպմանը «Միտք» վերլուծական կենտրոնի փորձագետ Վահե Սարգսյանն ասաց, որ եթե Ադրբեջանը դառնա այդ գազամուղի սեփականատերը, մենք կհայտնվենք պատերազմական իրավիճակում։ Այդ դեպքում, ըստ փորձագետի, հայկական կողմը մի շարք անելիքներ ունի, մասնավորապես, պետք է աշխատի իրանական գազատարի ուղղությամբ։
«Գազամուղի վաճառքն Ադրբեջանին մեզ համար ունի նաև դրական կողմ. վերջապես ՀՀ իշխանությունները կմտածեն այլընտրանքային ուղիների մասին»,- նշեց փորձագետը։
Հայ-վրացական գազատարի վաճառքի դեպքում, Սարգսյանի խոսքով, հայկական կողմը ևս մեկ քայլ պետք է ձեռնարկի՝ ի պատասխան Ադրբեջանի սանձարձակության։ Վահե Սարգսյանը համոզված է, որ հիշյալ վաճառքի իրականացման դեպքում հայկական կողմը պետք է բարձրացնի ԼՂԻՄ-ի Շահումյանի և Գետաշենի շրջանների ազատագրման հարցը, որտեղով անցնում են խոշոր գազանավթային նախագծերը։ Ըստ փորձագետի՝ այդպիսով կխառնվեն գերտերությունների ծրագրերը, քանի որ խոշորագույն նախագծերն անցնում են հյուսիսային Արցախով։