Հայ եւ թուրք պատանի բասկետբոլիստները համատեղ կմարզվեն Թուրքիայում

Ամերիկացիների կնքահայրությամբ Հայ եւ թուրք պատանի բասկետբոլիստները համատեղ կմարզվեն Թուրքիայում Այս մասին լռում են և՛ իշխանությունը և՛ ընդդիմությունը

«Հայաստան» շբթ., Աթենք, 23.08.10թ.: 24 հայ եւ թուրք պատանիներ ու աղջիկներ օգոստոսի 19-29-ը Թուրքիայում կմարզվեն ԱՄՆ Բասկետբոլի ազգային ասոցիացիայի՝ NBA-ի նախկին խաղացող Ջորջ Մուրեսանի կողմից: Այս մասին հաղորդել է Անկարայում ԱՄՆ դեսպանությունը: Հայաստանում Միացյալ Նահանգների դեսպանության հասարակայնության հետ կապերի վարչության փոխանցմամբ՝ այդ քայլը ֆինանսավորվում է ԱՄՆ արտաքին գործերի նախարարության «Միավորված սպորտներ» ծրագրի կողմից: Երևանում ԱՄՆ դեսպանության գործերի ժամանակավոր հավատարմատար Բրուս Դոնահյուն իրենց այս նախաձեռնության մասին ասել է. «Այս ծրագիրը ցույց է տալիս, թե ինչպես սպորտը, սպորտի նկատմամբ սերը կարող է մտերմացնել մարդկանց՝ դրանով իսկ աննշան դարձնելով բոլոր տարբերությունները: Հուսով ենք, որ փոխադարձ հարգանքն ու ըմբռնումը այս երիտասարդ մարզիկների միջև կծառայեն ի նպաստ Հայաստանի և Թուրքիայի՝ որպես հարևանների, և երկու երկրների առավել պայծառ ապագայի»: Ծրագրի իրականացման առաջին շաբաթը պատանիները կանցկացնեն Թուրքիայի Օրեն քաղաքի սպորտային ճամբարում, որտեղ սպորտային պարապմունքների ընթացքում ՙնրանք և նրանց մարզիկներն ուսումնասիրելու են երիտասարդների առաջնորդության և միջմշակութային հաղորդակցության սկզբունքները»: Երկրորդ շաբաթվա ըթնացքում մասնակիցները կմեկնեն Իզմիր քաղաք՝ հանդես կգան բարեկամական խաղերով, ներկա կլինեն Բասկետբոլի միջազգային ֆեդերացիայի (FIBA) կողմից անցկացվող բասկետբոլի աշխարհի առաջնության առաջին օրվան և Ջորջ Մուրեսանի հետ կմասնակցեն բասկետբոլի թաղային ուսումնական կենտրոնի աշխատանքներին: Հաջորդ տարվա հունվարին նույն հայ և թուրք պատանիները կուղևորվեն Միացյալ Նահանգներ՝ մարզվելու և խաղալու ամերիկացի երիտասարդների հետ: Պատմական և աշխարհա-քաղաքական լուրջ տարաձայնությունների նկատմամբ ԱՄՆ-ի արտաքին գերատեսչության նման մակերեսային մոտեցումները, Միջին արևելքում անգամներ ցույց են տվել իրենց, մեղմ ասած, անարդյունավետությունը: Իսկ ամերիկյան «սպորտային» այս յուրօրինակ նախաձեռնության մասին շարունակում են լուռ մնալ ՀՀ իշխանությունները, ընդդիմությունն ու հասարակական կազմակերպությունները: