Panorama.am. 1-2-2011- Ասամբլեայի Վանաձորի գրասենյակը գրությամբ դիմել է ՀՀ վարչապետ Տիգրան Սարգսյանին՝ պարզաբանումներ ստանալու WikiLeaks-ում ներկայացված տեղեկության մասին. «Հայաստանը , հանձինս իր կառավարության բարձրաստիճան պաշտոնյաների, Իրանի Հանրապետությանն է վաճառել զենք, որը գնվել է Բուլղարիայի Հանրապետությունից»:Մասնավորապես, կազմակերպության նախագահ Արթուր Սաքունցը վարչապետից հետաքրքրվել է, թե ինչո՞ւ մինչ այժմ որևէ պաշտոնական պարզաբանումներ Հայաստանի իշխանությունների կողմից զենքի գնման և վաճառման օրինականության, վճարված գումարների աղբյուրների և ստացված եկամուտների օգտագործման վերաբերյալ չի հրապարակվել:
Առաջնորդվելով ՀՀ Սահմանադրության 27 հոդվածի և «Տեղեկատվության ազատության մասին» ՀՀ օրենքի 6-րդ հոդվածի համաձայն, Ա.Սաքունցը խնդրել է տրամադրել տեղեկատվություն այն մասին, թե`
1. Հայաստանի Հանրապետությունն ինչքա՞ն գումար է ծախսել Բուլղարիայի
Հանրապետությունից զինամթերք գնելու համար;
2. Հայաստանի Հանրապետությունն ինչքա՞ն գումարով է վաճառել նույն զենքը և
զինամթերքը Իրանի Հանրապետությանը;
3. Հայաստանի Հանրապետության պետական ո՞ր մարմինն է որոշում կայացրել
Բուլղարիայի Հանրապետությունից զենք գնելու վերաբերյալ;
4. Հայաստանի Հանրապետության ո՞ր պաշտոնատար անձն է ստորագրել Բուլղարիայի Հանրապետությունից զենքի գնելու և
Իրանի Հանրապետությանը նույն զինամթերքը վաճառելու վերաբերյալ պայմանագրերը:
Նա նաև վարչապետից խնդրել է տրամադրել ՀՀ և Իրանի Հանրապետության միջև կնքված զենքի գնման վերաբերյալ պայմանագրի պատճենը:
Ա.Սաքունցը հիշեցնում է, որ համաձայն «Տեղեկատվության ազատության մասին» ՀՀ օրենքի 9-րդ հոդվածի՝ քաղաքացիների տեղեկություն ստանալու գրավոր հարցմանը պատասխան տրվում է այն ստանալուց հետո 5 օրյա ժամկետում:
Tehran Time
Yerevan Time
No comments:
Post a Comment