Գողութի՞ւն թէ՞ անփութութիւն

Մենք բազմաթիւ անգամներ այդ ամբիւնից բարձրաձայնել ենք թէ մեր համայնքի կառոյցներում բացակայում է արհեստավարժ տնօրինութիւնը. Մենք բազմաթիւ անգամներ այս ամբիւնից բարձրաձայնել ենք թէ մեր համայնքի կառոյցներում բացակայում է արհեստավարժ տնօրինութիւնը եւ այդ իսկ պատճառով էլ համայնքը տուժում է անփորձառու, անփոյթ եւ անպատասխանատու անհատների շնորհիւ: Դրա օրինակները շատ են եւ ցանկացողներին կառաջարկենք դիմել մեր կայքէջի արխիւ, ուր պիտի գտնեն մեր նախկին հրապարակած յօդւածները: Նմանօրինակ երեւոյթները կարծես չեն աւարտւում մեր համայնքում, եւ այս անգամ Հ.Մ.Արարատ Կ. -ը կրկին ուշադրութեան կենտրոնում է յայտնւել: Խնդիրը դրանում է կայանում, որ մատուռի նորակառոյց ճաշարանի պատասխանատու Զարեհ Մարգարեանը իր բաժնի վաստակած մի քանի ամսւայ գումարներով, անյետացել է: Ասում են թէ նա արտագաղթել է: Ըստ տւեալների գումարը կազմում է 300-350 միլիոն թուման: Հարցը բարդանում է այն ժամանակ, երբ տեղեկանում ենք թէ վերոնշեալը հաշւետու է եղել կազմակերպութեան ներքին վարիչ՝ Արա Շահնազարեանին: Դժբախտաբար պրն. Շահնազարեանը ինչ-ինչ պատճառներով մի քանի ամիս Զարեհ Մարգարեանից հաշւետւութիւն չի պահանջել, եւ նա էլ վարիչի վստահութիւնից ու անփորձութիւնից օգտւելով դիմել է նման անպատասխանատու քայլի: Ինչպէս սկզբում ասացինք, նման երեւոյթներ նորութիւն չեն մեր համայնքում եւ տեղ-տեղ կարելի է տեսնել նմանօրինակ անպատասխանատու արարքներ, որոնց գլխաւոր պատճառը հէնց մեր վարչական թուլութիւնն է: Երբ անփորձառու եւ անպատասխանատու անհատները, միայն բարեկամական կամ խմբակցական կապերի բերումով հասնում են վարչական աթոռների, էլ ոչ մի դրական արդիւնք սպասել հնարաւոր չէ: Դեռ պիտի սպասենք ու տեսնենք, թէ Արարատ մարզաւանում գոյացած քննչական յանձնախումբը ինչ արդիւնքների պիտի հասնի: Արդեօ՞ք գտնւելու է կորած գումարները եւ պատժւելու են անպատասխանատու անհատները թէ կրկին ... : 05 December, 2009 07:28:00 ԻՐԱՆԱՀԱՅԵՐ ԼՐԱՏՈՒ http://www.iranahayer.com/armenian_iranians_news/2035.html