Ալի Բաբաջանը այլևս Թուրքիայի արտգործնախարար չէ

Tert.am.3-5-2009- Թուրքիայի վարչապետ Ռեջեփ Թայիփ Էրդողանը երեկ հայտարարել է նախարարների կաբինետի պաշտոնների փոփոխության մասին։ Փոփոխություններ են արձանագրվել հիմնական ինը պաշտոններում, այդ թվում՝ արտգործնախարարի։ Ինչպես հաղորդում է թուրքական Hurriyet-ը, առանցքային և էական փոփոխությունը Ահմեդ Դավիթօղլուի նշանակումն է երկրի արտգործնախարարի պաշտոնին, ով այդ պաշտոնում փոխարինել է Ալի Բաբաջանին։ Վերջինս էլ նշանակվել է տնտեսության համակարգման համար պատասխանատու նախարար։ Այդ նշանակման շնորհիվ մինչ այդ տարբեր նախարարների հսկողության տակ գտնվող հաստատությունները կմիավորվեն մեկ կառույցում։ Թուրքիայի վարչապետը Բաբաջանի նշանակումն այդ պաշտոնին բացատրել է տնտեսական ծանր իրավիճակում մեկ ղեկավար անձի առկայության կարևորությամբ։ «Մենք ցանկանում ենք էլ առավել ուժեղանալ և մեկ ղեկավար ձեռք ունենալ տնտեսության վրա»,- հավելել է Էրդողանը։ Նշենք նաև, որ իրենց պաշտոններից են զրկվել ութ նախարարներ։ Տասը նախարարներ մնացել են իրենց պաշտոններում։