Ռուսաստանի ջավախքահայերը խոսքից անցնում են գործի

Tert.am. 22-3-2010- Ռուսաստանի ջավախքահայ համայնքը բազմիցս դիմել է վրացական իշխանություններին և միջազգային կազմակերպություններին՝ նրանց ուշադրությունը հրավիրելով ջավախքահայերի և Վրաստանի ազգային փոքրամասնությունների խնդիրներին։ Սակայն ոչինչ չի փոխվում։ Այս մասին ասվում է Ռուսաստանի ջավախքահայության տարածած հաղորդագրությունում։ Ջավախքահայերը դժգոհում են, որ եվրոպական ու հյուսիսատլանտյան ժողովրդավարական իսնտիտուտները փակում են աչքերը իրենց խնդիրների վրա։ Ինչպես նշվում է հաղորդագրությունում, Ռուսաստանի ջավախքահայությունը որոշել է խոսքից անցնել հստակ գործողությունների. նրանք պատրաստվում են կազմակերպել բողոքի ցույցեր, որոնք կշարունակվեն այնքան ժամանակ, քանի դեռ չեն ձեռնարկվել հստակ գործողություններ Սամցխե-Ջավախք-Ծալկա շրջանում և ընդհանրապես Վրաստանում ազգային փոքրամասնությունների իրավունքների և ազատությունների ոտնահարմանը վերջ տալու ուղղությամբ։ Ռուսաստանի ջավախքահայ համայնքը կոչ է անում Վրաստանի ընդդիմադիր կուսակցություններին, Վրաստանում ազգային փոքրամասնությունների շահերը պաշտպանող հասարակական կազմակերպություններին, ինչպես նաև միջազգային ուժերին սատարել իրենց և միանալ բողոքի ակցիաներին։