Իսլանդիայի իշխանությունները մտադիր են բետոնապատել հրաբուխը

Tert.am. 21-4-2010- Իսլանդիայի Էյաֆյատլայոկուդլ հրաբխի խառնարանը, հավանաբար, կբետոնապատվի։ Նման նախաձեռնությամբ, ինչպես հաղորդում է rbc-ն, հանդես են եկել Իսլանդիայի իշխանությունները։ Իսլանդացի գիտնականների խոսքով՝ իրականում հնարավոր է բետոնապատել հրաբխի խառնարանը, սակայն այդ գործընթացը կտևի մոտ երկու ամիս, իսկ ծախսերը կկազմեն 900 մլն դոլար։ Հրաբուխը բետոնապատելու պատրաստակամությամբ արդեն հանդես է եկել ռուսական մի ընկերություն։ Ըստ ընկերության ներկայացուցիչների՝ բետոնապատման աշխատանքներն սկսելու համար հարկավոր է սպասել, որպեսզի այն մի փոքր սառչի։ «Եթե ջերմությունը բարձր է, ապա բետոնի անէացման, ներծծման վտանգ կա։ Իսկ եթե ջերմությունը բարձր չէ, հրաբուխը սառել է, այդ ժամանակ ամեն ինչ իրատեսական է»,- պարզաբանել են ռուս մասնագետները։ Նշենք, որ Իսլանդիայի հրաբուխը ժայթքել է մարտի 20-ին։ Ապրիլի 14-ին տեղի է ունեցել երկրորդ ժայթքումը, որի հետևանքով առաջացել են հրաբխային մոխրի ամպեր՝ ծածկելով Եվրոպայի երկինքն ու կաթվածահար անելով ավիահաղորդակցությունը։ Հրաբուխը 200 տարի քնած էր։