Էրդողան. Վաշինգտոնյան այցի առաջնային թեման Հայաստանի հետ կապված զարգացումներն են, այդ թվում` ԼՂ խնդրի կարգավորումը

News.am. 12-4-2010- Թուրքիայի վարչապետ Ռեջեփ Թայիփ Էրդողանը ապրիլի 11-ին ԱՄՆ մեկնելուց առաջ Անկարայի Էսենբողա օդանավակայանի պետական հյուրատանը լրագրողներին հայտարարել է, որ վաշինգտոնյան այցի առաջնային թեման Հայաստանի հետ կապված զարգացումներն են, այդ թվում` Ղարաբաղի խնդրի կարգավորումը: «Միջուկային անվտանգության գագաթնաժողովին մասնակցելուց բացի հանդիպում եմ ունենալու նաեւ ԱՄՆ նախագահ Բարաք Օբամայի հետ: Առաջնային թեման Հայաստանի հետ կապված զարգացումներն են: Իմ հատուկ ներկայացուցչին ե՛ւ Հայաստան, ե՛ւ Ադրբեջան ուղարկեցի: Իմ ուղերձները փոխանցեցին Հայաստանի եւ Ադրբեջանի նախագահներին: ԱՄՆ-ում առիթ է լինելու մեր աշխատանքները քննարկել»,- ասել է Էրդողանն ու հավելել. «Մենք ցանկանում ենք, որ Մինսկի եռյակը այս տարածաշրջանում խաղաղություն ապահովելու համար ավելի ակտիվ լինի եւ արդյունքների հասնի: Մինսկի խմբի երկրների նախագահներ Օբամայի, Մեդվեդեւի եւ վերջերս էլ Սակոզիի հետ եմ խոսել: ԱՄՆ-ում կրկին միասին ենք լինելու: Այս հարցը երկկողմ հանդիպումներում քննարկելու ենք»: