Արզումանյան. Էրդողանը կոմպրոմիս է առաջարկում

Aysor.am. 18.05.2010- Այսօր Մոսկվան ու Անկարան լուծում են չափազանց կարևոր ռազմավարական համագործակցության մի հարց, որտեղ Հայաստանը կարող է մանրադրամի ճակատագիր ունենալ, գտնում է Հայ ազգային կոնգրեսի ներկայացուցիչ, Հայաստանի նախկին արտգործնախարար Ալեքսանդր Արզումանյանը: «Պատմությունը ցույց է տալիս, որ երբ Օսմանյան կայսրությունն ու Ռուսական կայսրությունը որեևէ համատեղ որոշում են կայացրել, միշտ տուժել է Հայաստանը»,- ասաց նա` այսօր տեղի ունեցած ասուլիսի ժամանակ: Անդրադառնալով հայ-թուրքական հարաբերությունների կարգավորմանը` բանախոսը կարծիք հայտնեց, որ մինչ Թուրքիայում կայանալիք խորհրդարանական ընտրությունները, Անկարան չի վերադառնա այդ հարցին «Հնարավոր է, որ հաջորդ ապրիլի 24-ի շեմին հայ-թուրքական կարգավորման հարցը կրկին արծարծվի»,- կանխատեսեց բանախոսը: Անդրադառնալով Լեռնային Ղարաբաղի հարակից երկու շրջաններից` Քելբաջարից և Ֆիզուլիից հայկական ուժերի դուրսբերման հավանականության մասին թուրքական լրատվամիջոցների հրապարակումներին, նախկին արտգործնախարարը կարծիք հայտնեց, որ «դա դոզայով տրված արտահոսք էր, որով հստակեցվեց, որ Թուրքիայի վարչապետ Էրդողանը և ՌԴ նախագահ Մեդվեդևը եկել են ինչ-ինչ համաձայնությունների»: Բանախոսը չի բացառում, որ Էրդողանը փորձում է ներկայացնել նոր ճանապարհային քարտեզ, որով նախատեսվում է երկու տարածքների վերադարձը, և որի դիմաց Ադրբեջանը կհամաձայնի ստորագրել խաղաղ ճանապարհով հակամարտության լուծումն ու ուժի կիրառումը բացառող պայմանագիր: «Սա լինելու է այն կոմպրոմիսը, որին կհետևեն հնարավոր ճանապարհների, կոմունիկացիաների բացումները»,- ասաց Ալեքսանդր Արզումանյանը: