«Թուրքիայի` Նախիջևանի ռազմաբազայի համար սահմանափակումներ կան»

«Aysor.am», 23.08.10թ.: Սևծովյան-Կասպյան տարածաշրջանի քաղաքական և սոցիալական հետազոտությունների ինստիտուտի տնօրեն Վլադիմիր Զախարովը այսօր Երևան-Մոսկվա տեսակամուրջի ընթացքում իր գործընկեր քաղաքագետների ուշադրությունը հրավիրեց այն փաստի վրա, որ նախքան Ռուսաստանի նախագահ Դմիտրի Մեդվեդևի այցելությունը Հայաստան, Բաքվում տեղի է ունեցել Թուրքիայի և Ադրբեջանի նախագահների հանդիպում, ովքեր համաձայնագիր են ստորագրել: Նա նշեց, որ, անշուշտ, այդ համաձայնագիրը ներառել է նաև ռազմաքաղաքական դրույթներ, և համոզմունք հայտնեց, որ Նախիջևանում, ամենայն հավանականությամբ, կտեղակայվի թուրքական ռազմաբազա: «Պետք չէ մոռանալ, որ Ադրբեջանն ու Թուրքիան միշտ խոսում են պաշտոնական լեզվով և ոչ մի ավելորդ բան չեն ասում, այդ մենք է, որ պետք է վերլուծենք ու ենթադրություններ անենք»,- նշեց Վ. Զախարովը, ով հայտնեց նաև, որ ռազմական հարցերի վերաբերյալ շատ դրույթներ, հավանաբար, մնացել են «կադրից դուրս»: Ի պատասխան այս մտահոգության` Կովկասի ինստիտուտի քաղաքական հետազոտությունների բաժնի ղեկավար Սերգեյ Մինասյանը հայտնեց, որ այս մասին մամուլում տեղ գտած հրապարակումները դեռևս չեն նշանակում, որ այն կարող է իրականություն դառնալ: «Շատ սահմանափակումներ կան այն բանի համար, որ Թուրքիան իր ռազմաբազան ունենա Նախիջևանում` սկսած Թուրքիայի` ՆԱՏՕ-ին անդամակցությունից` վերջացրած տարածաշրջանի խոշոր խաղացողներով` Ռուսաստանով և Իրանով, որոնք շատ լուրջ հարցեր կունենան այս փաստի հետ կապված»,- բացատրեց Ս. Մինասյանն ու հավելեց. «Մյուս կողմից, ես չեմ կարծում, որ Թուրքիան ցանկություն կունենա ևս մեկ գլխացավանք ավելացնել` կապված Հայաստանի Հանրապետության հետ»: