Tert.am. 4-12-2010Ադրբեջանի քաղաքական էլիտան և հասարակությունը հիասթափված են Աստանայի գագաթնաժողովից։ Այսօր լրագրողների հետ հանդիպման ժամանակ նման տեսակետ հայտնեց վերլուծաբան Արմեն Մինասյանը՝ նշելով, որ Աստանայում զարգացումներն Ադրբեջանի ցանկացած հունով չընթացան։ Հետևաբար, ադրբեջանցիները գագաթնաժողովը համարում են տապալված։«Նրանք փորձում են մեղքը գցել Հայաստանի վրա, Հայաստանին մեղադրել ապակառուցողական մոտեցման մեջ։ Բայց թե ինչում է ապակառուցողական, որևէ հիմնավորում չի բերվում։
Դրան զուգահեռ հակահայկական քայլեր են ձեռնարկում՝ ապացուցելով այն, ինչի վերաբերյալ ԵԱՀԿ-ն ամփոփիչ հռչակագրում մտահոգություն է հայտնում»,- նշեց Միանսյանը՝ հիշեցնելով, որ Իլհամ Ալիևի ելույթը գագաթնաժողովում հակասում էր և հնգակողմ հայտարարության բովանդակությանը, և ընդունված հռչակագրին, որոնցով կոչ էր արվում բացառել ուժի կիրառումը։ Ըստ վերլուծաբանի, գագաթնաժողովից հետո Ադրբեջանում հակահայկական քարոզչությունը շարունակվում է և նոր թափ է առել։
Իսկ գագաթնաժողովի շրջանակներում ընդունված հնգակողմ հայտարարությունն, ըստ բանախոսի, փորձում է ցույց տալ, որ գործընթացը շարունակվում է։ «Բայց բոլորին էլ հասկանալի է, որ գործընթացը մի տեղապտույտի մեջ է, և պետք է, իրոք, որոշում կայացվի, քայլ արվի։ Հայաստանի և Ադրբեջանի նախագահների ելույթները ցույց տվեցին, որ կողմերը խոշոր քայլ անելու պատրաստ չեն։ Իսկ չանել հայտարարություն, կնշանակեր, որ Մինսկի խումբն արդյունավետ չի աշխատում»,- ընդգծեց Մինասյանը։
Վերլուծաբան Տիգրան Աբրահամյանն էլ նկատեց, որ Ադրբեջանը ցանկացած ամբիոն օգտագործում է ռազմատենչ հայտարարություններ անելու համար։ «Ադրբեջանը՝ երկրի ղեկավարի գլխավորությամբ, ցանկացած ամբիոն օգտագործում է հայատյացություն սերմանելու համար»,- նշեց նա։ Տիգրան Աբրահամյանի խոսքով՝ Ադրբեջանի նախագահն անգամ իր երկրի դպրոցահասակ երեխաների մոտ է հակահայկական ելույթներ ունենում։
Tehran Time
Yerevan Time
No comments:
Post a Comment