«Բարև ձեզ. մենք եկել ենք փրկելու ձեզ: Երկիրը խեղդվում է մեղքերի մեջ, իսկ փրկության միակ ճանապարհը մենք կարող ենք ցույց տալ»,- տոնական և նախորդող մի քանի օրերին օրական մի քանի անգամ դուռը բացելով՝ Հարավարևմտյան թաղամասի շենքերում կարող էիր հանդիպել այս տողերը կրկնող տարբեր տարիքի կանանց և տղամարդկանց: Սկզբում մտածում ես, թե խելագար է, հետո` թե օգնություն է ուզում, քիչ ավելի ուշ հասկանում, որ քեզ է եկել փրկելու:Եհովայի վկաները կամ Հայաստանում արդեն 50-ից ավելի աղանդավորական կազմակերպությունների անդամներն են նրանք, ովքեր տոնական օրերին ավելի ու ավելի են ակտիվանում: Հայտնի «Կյանքի խոսք» ուղղության անդամներից մեկի հետ խոսելով՝ անձնական կապերի միջոցով հաջողվեց մի քանի բան իմանալ, քանի որ այլ դեպքում նրանք շատ «ամուր» բերան ունեն: 30-ամյա կինը պատմեց, որ իրենք ամբողջ օրը թափառում են քաղաքի փողոցներում ու մարդ «որսում»: Եվ եթե սովորական օրերին անդամներից յուրաքանչյուրը օրական գոնե 1-ին պետք է տաներ, Ամանորի նախաշեմին 5-ից պակասն անթույլատրելի էր, հակառակ դեպքում կզրկվեին ամանորյա օգնությունից:
Հայաստանը ներկայումս ողողված է տարբեր տեսակի աղանդներով, որոնք ամեն քայլափոխի իրենց «որսն» են անում: Դրանք հիմնականում մեկը մյուսի «ճուտիկն» են. մեկը ծաղկում է, թափ է հավաքում և օգնում է, որ մի այլ տեղ ևս մի այդպիսի ճյուղավորում բացվի: Նրանցից յուրաքանչյուրն առանձնացել է ավանդական եկեղեցու ուսմունքից և համարում է, որ ինքն է միակ ճշմարիտն ու փրկության առաջնորդողը, իսկ բոլոր մնացած ուսմունքները տանում են դեպի կործանում: Փողոցում, այգում, սրճարանում և նույնիսկ տանը աղանդավորներից ազատում չկա:
«Եկել են ու ասում, թե մենք գտնվում ենք ծայրահեղ վատ վիճակում, մեր հոգևոր վիճակն այնքան վատն է, որ օտարերկրյա հորեղբայրները, քեռիներն ու մորաքույրները հույժ անհանգստացած են մեր այս վիճակով»,- ասում է Սբ Հովհաննես եկեղեցու սպասավոր տեր Շմավոն քահանա Ղևոնդյանը:
Սկզբնական շրջանում նրանք հիմնվում են բարեգործությունների վրա. ամենուրեք կազմակերպում են բարեգործական ակցիաներ, նվիրատվություններ, օգնում են տարեց մարդկանց, չգիտես ինչու՝ թույլատրված է նրանց մուտքը մանկատներ, ծերանոցներ: Ամանորի նախաշեմին էլ նույն միջոցներով նրանք մուտք գործեցին շատ չքավորների տներ և գտան իրենց հետևորդներին:
Հոգեբան Հմայակ Սարգսյանն ասում է, որ ամենից հաճախ նրանք դիմում են մարդկանց, ովքեր տվյալ պահին գտնվում են ծանր սոցիալ-հոգեբանական վիճակներում, երկար ժամանակ միայնակ մնացած թոշակառուներին, ովքեր սիրո ու ջերմության պակաս ունեն և, բնականաբար, հասնում են իրենց ուզածին:
Աղանդների տարածման նման մեծ թափի պատճառը, հոգևորականների, ինչպես նաև քաղաքագետների կարծիքով, մեկն է. կրոնը բոլոր ժամանակներում էլ մարդկանց կառավարելու միջոց է եղել, և բնավ էլ նորություն չէ, որ Հայաստանում էլ դրանց տարածումը տարբեր հետախուզական կազմակերպությունների պատվերն է:
Tehran Time
Yerevan Time
No comments:
Post a Comment