Մամեդյարովը Մեդվեդևին է փոխանցել Բաքվի պատասխանը

Tert.am. 18-7-2011- Այցով Մոսկվայում գտնվող Ադրբեջանի արտգործնախարար Էլմար Մամեդյարովը ՌԴ նախագահ Դմիտրի Մեդվեդևին է փոխանցել Բաքվի՝ ղարաբաղյան հիմնախնդրի հետ կապված առաջարկների պատասխանը։ Այս մասին, ինչպես տեղեկացնում է SalamNews–ը՝ վկայակոչելով Россия 24 հեռուստաալիքը, Մամեդյարովի հետ համատեղ ասուլիսին հայտարարել է Ռուսաստանի արտգործնախարար Սերգեյ Լավրովը։
Ընդգծելով, որ բանակցային գործընթացում ամեն ինչ Ադրբեջանից կախված չէ, Մամեդյարովը նշել է, որ պետք է սպասել նաև Երևանի պատասխանին։
«Սակայն մենք կարծում ենք, որ բանակցային գործընթացում առաջընթաց կա։ Մենք աստիճանաբար շարժվում ենք դեպի այն կետը, երբ բոլորը կհասկանան, որ առկա իրավիճակը ոչ մեկին ձեռնտու չէ, այդ թվում՝ մեր հարևաններին»,– ասել է Մամեդյարովը։
Հիշեցնենք, որ օրեր առաջ ՌԴ արտգործնախարար Սերգեյ Լավրովը Հայաստան և Ադրբեջան կատարած այցերի ընթացքում Երևանին և Բաքվին էր փոխանցել ՌԴ նախագահ Դմիտրի Մեդվեդևի՝ ղարաբաղյան հիմնախնդրի կարգավորման հետ կապված առաջարկները։