Ադրբեջանի պաշտպանության նախարարը կպաշտոնազրկվի՞

Panorama.am. 18-7-2011- Ադրբեջանի պաշտպանության նախարար, գեներալ-գնդապետ Սաֆար Աբիևը հրաժարականի սպառնալիքի տակ է հայտնվել: Նրա նկատմամբ ճնշումները սաստկացել են: Այս մասին տեղեկացնում է «PRESS-TV»-ին:

Հիշեցնենք, որ ադրբեջանական լրատվամիջոցները հայտնել էին, որ զորամասերից մեկի երեք սպաներ ինտերնետում տեղադրել են մի տեսանյութ, որում նշվում է այն մասին, թե ինչ մակարդակի է հասնում ադրբեջանցի բարձրաստիճան սպաների՝ կոռոպցիոն սկանդալներում ներգրավվածությունը: Տեղադրված տեսանյութում ադրբեջանական բանակի ավագ սպաները և զինվորները ասում են, որ իրենք ստիպված են եղել իրենց սեփական միջոցներով ձեռք բերել շինարարական նյութեր, որպեսզի կարողանան վերանորոգել իրենց` ուժգին քամուց քանդված զորանոցները:
«Հրամանատարը ասել է, որ մենք մեր ուժերով պետք է վերանորոգենք զորանոցը` օգտագործելով մեր աշխատավարձային քարտերը»-տեսանյութում նշում էին ադրբեջանական բանակի սպաները:
«PRESS-TV»-իի փոխանցմամբ, սա այդ զորամասում գրանցված առաջին դեպքը չէ: Առկա են բազմաթիվ զեկույցներ ադրբեջանական բանակում արձանագրված մեծ թվով կոռուպցիոն փաստերի մասին: