Մարդկային ուղեղը զարգացման գագաթնակետին է. այն այլևս չի զարգանա

Tert.am. 1-8-2011- Մարդկային ուղեղի հնարավորութունները հասել է իր գագաթնակետին. ֆիզիկայի և ֆիզիոլոգիայի օրենքներն այլևս հնարավորություն չեն տալիս մեծ չափով ավելացնել Homo sapiens-ի մտավոր գործունեությունը։ Ինչպես հաղորդում է «Բի-Բի-Սի»-ն, այսպիսի եզրակցության են եկել Քեմբրիջի համալսարանի գիտնականները։
Մարդու ուղեղի կառուցվածքի և նրա կողմից էներգիայի օգտագործման հետազոտության արդյունքում գիտնականները եկել են այն եզրակացության, որ մի քանի միլիոն տարի շարունակվող ինտելեկտուալ կարողությունների էվոլյուցիայի աստիճանական գործընթացը այժմ հասել է իր ֆիզիկական գագաթնակետին։
«Մենք հասել ենք ուղեղի զարգացման գագաթնակետին»,- հայտարարել է Քեմբրիջի համալսարանի պրոֆեսոր Սայմոն Լոգլինը։ Նրա խոսքերով՝ մարդու ուղեղին բաժին է ընկնում մարդու ընդհանուր քաշի միայն 2%-ը, սակայն այն օգտագործում է մարմնի էներգիայի մոտ 20%-ը։ «Մենք պարզել ենք, որ ինտելեկտուալ գործունեության զարգացման համար մարդու ուղեղը կարիք ունի լրացուցիչ և ավելի մեծ քանակությամբ էներգիայի, որը նա չի կարող ստանալ մարդու կառուցվածքի ֆիզիկական առանձնահատկությունների պատճառով»,- նշել է գիտնականը։
Սակայն մարդու հետագա ինտելեկտուալ զարգացումը հնարավոր չէ ոչ միայն էներգիայի պակասի պատճառով. բրիտանացի գիտնականները եկել են այն եզրակացության, որ ուղեղի կառուցվածքը կատարելագործման համար ներքին պոտենցիալ այլևս չունի։