Թուրքիայի ընդդիմության առաջնորդը կարող է զրկվել պատգամավորական անձեռնմխելիությունից

Tert.am. 9-1-2012- Թուրքիայի Ստամբուլ քաղաքի շրջանային դատախազությունը Թուրքիայի խորհրդարանից պահանջել է պատգամավորական անձեռմխելիությունից զրկել ընդդիմադիր Հանրապետական–ժողովրդական կուսակցության առաջնորդ, խորհրդարանի պատգամավոր Քեմալ Քըլըչդարօղլուին։ Ինչպես հաղորդում է ադրբեջանական1news.az կայքը, դատախազությունը գտնում է, որ Քըլըչդարօղլուն փորձում է ազդել Թուրքիայում 2010թ. ռազմական հեղաշրջում իրականացնելու փորձի առնչությամբ անցկացվող հետաքննության վրա։ Թուրքական Taraf պարբերականի տվյալներով՝ 2010թ. Թուրքիայի զինված ուժերը մշակել էին «Քուվալդա» անունը կրող ծրագիրը՝ երկրի կառավարությունը տապալելու համար։ Այդ պլանի համաձայն՝ Ստամբուլի Fatih Camisi և Bayazid մզկիթների մոտ պայթուններ պետք է տեղի ունենային, ապա` հարձակում Թուրքիայի ռազմական թանգարանի վրա, որից հետո երկրի զինված ուժերը պետք է տապալեին կառավարությունը։ Թերթի հաղորդմամբ՝ 2002–2003թթ. մշակված ծրագրի տակ դրված էր Թուրքիայի ԶՈՒ նախկին գեներալ Չեթին Դոգանի ստորագրությունը։ Հեղաշրջումից հետո զանգվածային ձերբակալություններ պետք է սկսվեին։