Էրդողանը հանդիպելու է ֆրանսիացի գործարարների հետ` կանխելու Ցեղասպանության օրինագծի ընդունումը Ֆրանսիայի սենատում

Panorama.am. 10-1-2012- Թուրքիայի վարչապետ Ռեջեփ Թայիփ Էրդողանը Անկարա ժամանած նորվեգացի իր պաշտոնակցի հետ հանդիպումից հետո հրավիրել է համատեղ մամուլի ասուլիս, որի ժամանակ խոսել է նաև Ֆրանսիայի սենատում քննարկվելիք Ցեղասպանության բանաձևի մասին: Համաձայն այդ բանաձևի` Հայոց ցեղասպանության ժխտումը Ֆրանսիայի տարածքում քրեորեն հետապնդելի է, նախատեսում է վարչական ու քրեական վարույթների հարուցում` 45.000 եվրո տուգանք և 1 տարի ազատազրկում: Ըստ թուրքական «CnnTurk» լրատվական ծառայության` լրագրողներից մեկն Էրդողանին նախ հիշեցրել է, որ Ֆրանսիայի ազգային ժողովի կողմից հիշյալ օրինագծի ընդունումից հետո վարչապետը հրապարակել էր Փարիզի դեմ գործադրվելիք պատժամիջոցների ցուցակ: Այժմ էլ հայտնի է, որ հունվարի 23-ին հիշյալ օրինագիծը բերվելու է սենատի օրակարգ: Արդյոք Թուրքիան պատրաստվում է նոր պատժամիջոցներ կիրառել: Ի պատասխան Էրդողանն ասել է, որ Անկարան հետամուտ է լինելու իր հրապարակած 8 պատժամիջոցների կիրառմանը: Նա կրկին հորդորել է ֆրանսիացի օրենսդիրներին զերծ մնալ նման բանաձևերի քննարկումից և չխառնվել պատմաբանների անելիքին: «Այս պահին Թուրքիայում լուրջ կապիտալ ներդրումներով գործող ֆրանսիական ընկերություններ կան, որոնք խորապես անհանգստացած են ստեղծված իրավիճակից: Այդ ընկերություններն արդեն հանդես են եկել նամակներով ու կոչերով, թե ինչ արդյունք կտա դա, դեռ չգիտեմ: Համենայնդեպս մենք այժմ ֆրանսիացի գործարարների հետ այստեղ նորից հանդիպելու ենք կազմակերպելու: Նրանց կրկին ներկայացնելու ենք այն խնդիրը, որ սենատի կողմից օրինագծի վավերացումը իսկապես կարող է լուրջ վնաս հասցնել ֆրանս-թուրքական հարաբերություններին: Հիշեցնենք, որ Ֆրանսիայի ազգային ժողովի կողմից Ցեղասպանության հերքումը քրեականացնող բանաձևի ընդունումից հետո Էրդողանը հրապարակել էր Փարիզի դեմ կիրառվելիք պատժամիջոցների հետևյալ ցուցակը. 1. Փարիզում Թուրքիայի արտակարգ և լիազոր դեսպանի հետկանչ: 2. Չեղյալ են հայտարարվում քաղաքական, ռազմական, ֆինանսական, տնտեսական, կադրերի փոխանակման և նմանատիպ այլ բնույթի համագործակցությունները: 3. Չեղյալ են հայտարարվում համատեղ զորավարժությունները: 4. Դադարեցվում են Ֆրանսիայի հետ ընթացող բոլոր քաղաքական խորհրդակցությունները: 5. Ֆրանսիակա ռազմական ինքնաթիռներն այսւոհետև ամեն թռիչքի պետք է առանձին-առանձին են թույլտվություն ստանան: 6. Եվրամիության հետ կազմվելիք նախագծերում չի ներառվելու Ֆրանսիայի հետ համագործակցությունը: 7. Այսուհետև մերժվելու են ֆրանսիական ռազմանավերի թուրքական նավահանգիստներ մուտք գործելու բոլոր դիմումները: 8. Էկոնոմիկայի նախարարների մասնակցությամբ 2012-ին ծրագրված Թուրքիա-Ֆրանսիա համատեղ տնտեսական ժողովին թուրքերը չեն մասնակցելու: