Իրանի նախագահ. ԱՄՆ-ի նպատակը աշխարհի ժողովուրդների «հազարավոր խնդիրներն» են, որպեսզի ղեկավարի նրանց

News.am. 10-1-2012- Իրանն ու Վենեսուելան դիմադրում են «ագահ եւ մեծամիտ» Միացյալ նահանգներին: Նման հայտարարությամբ հունվարի 9-ին նախագահ Հուգո Չավեսի հետ համատեղ մամլո ասուլիսում հանդես է եկել Իրանի նախագահ Մահմուդ Ահմադինեջադը:Հիշեցնենք, Իրանի նախագահը շրջագայում է Լատինական Ամերիկայի երկրներով եւ առաջինը այցելել է Վենեսուելա: Խոսելով միջուկային ռումբ ստեղծելու համար Իրանի հասցեին ուղղված մեղադրանքների մասին` Ահմադինեջադը նշել է, որ «այդ խոսքերը միայն ծիծաղ են առաջացնում»: «Այդ խոսքերի հետեւում միայն այն է թաքնված, որ իրականում նրանք (ԱՄՆ) չեն ցանկանում, որ մենք զարգանանք եւ առաջ գնանք: Նրանք չեն ուզում, որ մեր տնտեսությունը զարգանա, չեն ցանկանում, որ աղքատությունը վերանա, չեն ցանկանում, որ Իրանն արդյունաբերական երկիր դառնա»: Իրանի նախագահի կարծիքով` Միացյալ նահանգները ձգտում է, որ աշխարհի ժողովուրդները «հազարավոր խնդիրներ ունենան», որպեսզի ղեկավարի նրանց եւ իր կամքը թելադրի: Սակայն Ահմադինեջադը համոզմունք հայտնեց, որ Իրանի եւ Վենեսուելայի ժողովուրդների միջեւ համագործակցությունը «կխորանա, աստծու օգնությամբ մենք մեր նպատակներին կհասնենք»: Իր հերթին Վենեսուելայի նախագահ Հուգո Չավեսը հայտարարել է, որ «Իրանին միջուկային ծրագրում մեղադրում են ռազմական նկատառումներով, թեեւ ոչ ոք դրա ապացույցը չունի: Մենք գիտենք, որ յանկիների կայսրությունը վաղուց է Իրանը թիրախ դարձրել»: Բոլիվարյան հեղափոխության առաջնորդը վստահ է, որ հիմնական պատճառներից մեկը, որի համար ամերիկյան իմպերիալիզմը Իրանին թիրախ է դարձրել, նավթն է: «Իրանի նավթային պաշարները աշխարհում ամենահարուստներից են: Իրանն ու Վենեսուելան աշխարհում նավթի խոշորագույն արտադրողներն ու արտահանողներն», - ասել է Չավեսը, հաղորդում է ԻՏԱՌ-ՏԱՍՍ-ը: