Իսպանիայի հրեաների համայնքի ղեկավարը կոչ է անում ճանաչել Հայոց ցեղասպանությունը

News.am. 14-2-2012- El Paìs իսպանական պարբերականում հրատարակած հոդվածում Իսպանիայի հրեաների համայքնի նախագահ Իսաաք Քերուբը, խոսելով Հոլոքոստի ժխտումը քրեականացնող օրենքի մասին Իսպանիային կոչ է արել օրինակ վերցնել Ֆրանսիայից Հայոց ցեղասպանության հարցում, գրում է Nouvelles d’Armenie-ն: «Մենք դեռ ունենք մարդիկ, ովքեր ցանկանում են ավարտել այն, ինչ սկսել էր Հիտլեըը: Սա է պատճառը, որ պետության միջամտությամբ պետք է պատժվի նման վարքագիծը: Եվ ակնհայտ է, որ մենք լավ ուսուցչի կարիք ունենք, որը մեզ կսովորեցնի հարգել միմյանց: Սա անհրաժեշտ է», - ասել է նա: Իսաաք Քերուբն անդրադարձել է նաև մարդու բնական իրավունքների և փոքրամասնության պաշտպանության հարցում Ֆրանսիայի առաջատարությանը, հավելելով, որ «Հայոց ցեղասպանության ժխտումը քրեականացնող օրենքը պարտադիր է և անհրաժեշտ»: «Այստեղ, Իսպանիայում, մենք պետք է օրինաստեղծ մարմիններից պահանջենք նույնն այնել և որ այդ հանցագործությունն ընդգրկեն Քրեական օրենսգրքում», - ասել է նա: