Գյումրիում ռուսական բազայի օբյեկտներն օպտիմալացման շրջանակում կփոխանցվեն Հայաստանին

News.am. 27-9-2012- Գյումրիում ռուսական բազայի օբյեկտները կփոխանցվեն Հայաստանին` օպտիմալացման ծրագրի շրջանակում, NEWS.am-ի թղթակցին ասացին Հայաստանի պաշտպանության նախարարությունում: Հիշեցնենք, որ նախօրեին Ռուսաստանի կառավարությունը հավանության է արժանացրել ռուս-հայկական արձանագրության նախագիծը`Հայաստանի տարածքում ռուսական ռազմաբազայի տեղակայման մասին: Արձանագրությունը Հայաստանում ռուսական ռազմաբազայի տեղակայման 30 կետից ցուցակ է պարունակում: Ընդ որում` փաստաթուղթն ուժի մեջ մտնելուց հետո 10 կետեր ընդունման-հանձնման ակտով պետք է փոխանցվեն Հայաստանին: Այդ մասին խոսել էր Ռուսաստանի պաշտպանության նախարար Անատոլի Սրդյուկովը, ով անցած շաբաթ Երեւանում էր: «Քննարկվել է հարցերի լայն շրջանակ, այդ թվում` 102-րդ ռազմաբազայի գործունեության հետ կապված, բազայի վերակազմավորման շրջանակում հայկական կողմին 10 օբյեկտ փոխանցելու հետ կապված»,-նշել էր նախարարը: Որոշ տեղեկություններով խոսքը ռազմավարական նշանակության օբյեկտների մասին չէ: Նշենք, որ Հայաստանում ռուսական 102-րդ ռազմաբազայի գտնվելու ժամկետի երկարաձգման մասին արձանագրությունը ստորագրվել էր 2010 թ. օգոստոսին: